भांगरभूंय | प्रतिनिधी
मडगांव : मडगांव रेल्वे स्टेशनाचेर रेल्वे सुरक्षा दळाच्या जवानांनी ७.४ किलो गांजो जप्त केला. हाची किंमत सुमार ७.५ लाख रुपया आसा. ह्या प्रकरणांत दोगां दुबावितांक अटक केल्या. जप्त केल्लें सगलें सामान फुडले कारवाये खातीर पणजेच्या घुवळे वखदां नियंत्रण ब्युरोचे सुवादीन केलां.
हे विशीं मेळिल्ली चड म्हायती प्रमाण, ९ एप्रिलाक मडगांव रेल्वे स्टेशनाचेर ड्युटीक आशिल्ल्या आरपीएफ कर्मचार्यांनी सीसीटीव्ही फुटेजीची पळोवणी करतना दोग जाण दुबावीत तरेन भोंवतना दिसले. गाडी नंबर १२६१८ ’मंगला लक्षद्वीप एक्स्प्रेसीं’तल्यान देंविल्ल्या ह्या प्रवाशांच्यो हालचाली दुबावी दिशिल्ल्यान पुलिसांनी तांकां प्लॅटफॉर्म नंबर ३ चेर ताब्यांत घेतले. उपरांत तांचे कडेन आशिल्लीं बॅगां तपासलीं तेन्ना तातूंत ७.४ किलो गांजो मेळ्ळो. आंतरराष्ट्रीय बाजारांत ह्या गांजज्याची किंमत सुमार ७,५०,००० रुपया इतली आसा. आरपीएफान बेगोबेग दोगूय दुबावितांक ताब्यांत घेवन मडगांव रेल्वे पुलीस कार्यालयांत व्हेले.
ही कारवाय मडगांव रेल्वे सुरक्षा दळाचे पुलीस निरीक्षक मल्लिकार्जुन मिश्रा हांचे देखरेखी खाला सहाय्यक पुलीस उपनिरीक्षक सुरजीत कुमार, कॉन्स्टेबल राम प्रकाश मीना आनी रमेश कुमार हांणी केली. फुडल्या कायदेशीर तपासा खातीर रेल्वे पुलिसांनी दुबावीत आनी सगलो माल पणजेच्या घुंवळे वखदां विरोधी पंगडा कडेन दिलो. एनसीबीन ह्या प्रकरणांत गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
