भांगरभूंय | प्रतिनिधी
पणजी: सर्वसादारण मनशाक दिव्यांग मनशां बराबर लग्न करपाक प्रोत्साहन दिवप, लग्य जाल्ल्या जोडप्यांक अर्थीक मजत करप ह्या हेतान दिव्यांग सक्षमीकरण खात्यान दिव्यांग बंधन येवजण अधिसुचीत केल्या. तेप्रमाण अशा जोडप्यांक 1 लाख रुपया अर्थीक मजत दितले. हे खातीर जोडप्यातली एक वा दोगूय 40 टक्के परस चड दिव्यांग आसप तशेंच एकवटीत वर्सुकी उत्पन्न 8 लाख रुपया परस उणें आसप गरजेचें आसा. येवजणे खातीर लग्न जाले उपरांत तीन वर्सां भितर अर्ज करप गरजेचें आसा.
अधिसुचोवणे प्रमाण येवजणेचो लाव घेवपा खातीर अर्जदार 15 वर्सां गोंयांत राविल्लो आसप गरजेचें आसा. लग्न वा लग्नाची नोंदणी गोंयांत जाल्ली आसप गरजेची आसा. मजत निधी जोडप्यातल्या दिव्यांग आशिल्ल्या मनशाक दितले. दोगूय जाण दिव्यांग आसल्यार मजत निधी एकवटीत दितले. येवजणे खातीरचे अर्ज बीडीओ वरवीं खात्याक दितले. अर्जाचेर घोव-बायलेची सय आसप गरजेची आसा. अर्जा सयत लग्नाचें प्रमाणपत्र, यूडीआयडी कार्ड, घोव-बायल दोन वर्सां वा ताचे परस चड काळ एकठांय रावप आशिल्ल्याचें बीडीओचें प्रमाणपत्र जोडचें पडटलें.
तशेंच अर्जा सयत, बँक खातें पासबूक कॉपी जोडची पडटली. हे येवजणे खाला दितात त्या निधीचेर एक अधिकार म्हूण दवो करूंक मेळचो ना. अर्जदारांनी दिल्ल्या प्रतिज्ञापत्राच्या खरेपणाची खात्री करून बीडीओ अर्ज दिव्यांग सक्षमीकरण खात्याक धाडून दितलो. दिव्यांग मनशान पयल्या लग्नांत येवजणेचो लाव घेतिल्लो आसत जाल्यार दुसऱ्या लग्ना खातीरय येवजणे खातीर अर्ज केल्यार अशा मनशाक अपात्र थारायतले. दिव्यांग सक्षमीकरण खात्याचे संचालक आयिल्ल्या अर्जांची छाननी करून निमाणो निर्णय दितले. चुकीची वा अर्दकुटी म्हायती दिल्यार येवजणेचो लाव घेवंक मेळचो ना. तीन वर्सांनी येवजणेचो नियाळ घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
