भांगरभूंय | प्रतिनिधी
पणजी: खोर्ली- तिसवाडे एका सुपारमार्केटांतल्यान मोबायल, रोख रक्कम आनी घरगुती वस्तू मेळून 25 हजार रुपयांचो म्हालवज फारायलो. मूळ गांवांत पळ काडपाचो यत्न करीत आशिल्ल्या ओडिशा हांगासरल्या ओम साई राहुल (21) आनी काजोल कुमारी (19) ह्या ‘बंटी-बबली’क पोरणें गोंय पुलिसांनी पणजी कदंब बस स्टॅण्डार बुधवारा मध्यान रातीं अटक केली.
पोरणें गोंय पुलिसांनी दिल्ले म्हायती प्रमाण बिरेस्तारा 8 वेर रातीं सुमार 8 वरांचेर खोर्ली (तिसवाडी) हांगासरल्या एका सुपरमार्केटांत चोरी जाल्ल्याची म्हायती पोरणें गोंय पुलिसांक मेळ्ळी.
तेप्रमाण पुलीस निरिक्षक गौरेश मळीक हांच्या मार्गदर्शना खाला उपनिरिक्षक मनोहर धुळापकार आनी हेर पंगडान घडणूक थळार धांव घेवन पंचनामो केलो. तेप्रमाण सुपरमार्केटाच्या धनयान कागाळ दाखल केली.
एक मोबायल, पांच हजार रोख रक्कम आनी घरगुती वस्तू मेळून 25 हजार रुपयांचो म्हालवज फारायिल्ल्याचें कागाळें म्हणलें. तशेंच ह्या प्रकरणांत थंय काम करपी बायलेचेर दुबाव आशिल्ल्याचें पुलिसांक सांगलें.
ह्याच वेळार पुलिसांनी सदर बायलेची म्हायती घेवन तपास सुरू केलो. तेप्रमाण पुलिसांनी मध्यान रातीं पणजी कदंब बस स्टॅण्डार ओडिसा हांगा मूळ गांवांत वचपाचो यत्न करीत आशिल्ल्या ओम साई राहुल (21) आनी काजोल कुमारी (19 ह्या ‘बंटी-बबली’क अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
