भांगरभूंय | प्रतिनिधी
तशें पळोवंक गेल्यार फोंडें रितें ना, थंय आतां सरकाराचो प्रतिनिधी म्हूण रवीचो पूत रितेश आसा.
उच्च न्यायालयाच्या आदेशा उपरांत केंद्रीय वेंचणूक आयोगान अधिसुचोवणी काडून फोंडेंची पोटवेंचणूक रद्द जाली म्हूण जाहीर केलें. अधिसुचोवणी काडचें पयलींच फोंडें पोटवेंचणूक रद्द जाली म्हूण राजकी बोवाळ पडिल्लो. भाजप, काँग्रेस आनी आपान वेंचणुके खातीर पुराय तयारी केल्ली. वेंचणूक आयोगाचीय तयारी जाल्ली. बिरेस्तारा फक्त मतदान करपाचें तितलें उरिल्लें. मात, मतदान जावपाक सुमार 18 वरां उरिल्लीं आसतना उच्च न्यायालयाच्या निर्णयान राजकी भुंयकांप जालो, ह्या भुंयकांपा उपरांत राजकी पक्ष हाल्ले. खास करून विरोधी पक्ष.
फोंडें पोटवेंचणूक जिखून आपलें संख्याबळ वाडोवपा खातीर विरोधी पक्ष नेटान तयारी करताले. काँग्रेसी कडेन सध्या 3 आनी आपा कडेन 2 आमदार आसात. वट्ट 7 आमदार विरोधांत आसा. वेंचणूक जिखून हो आंकडो 8 करपा खातीर विरोधक नेटान तयारी करताले. तातूंतच काँग्रेसीन आपलो आंकडो चाराचेर व्हरपा खातीर पुराय नेट लायिल्लो. विधानसभा वेंचणुकेंत सर्गेस्त रवी नायक हांकां जैता खातीर घाम काडपाक लावपी केतन भाटीकाराक आपले वटेन घेवन राजकी समिकरणां हालोवपा खातीर पुराय तयारी केल्ली. केतनानूय हे वेंचणुके खातीर दीसरात एक करून आपूण जिखतांच अशें वातावरण निर्माण केल्लें. मात, वेंचणूक रद्द जाल्ल्यान आमदार जावपाचें सपन सध्या तरी भंगलें.
दुसरे वटेन भाजपान आपलो गड राखपा खातीर वजन लायिल्लें. भाजपाच्या मुखेल फुडाऱ्यांनी, कार्यकर्त्यांनी फोंडेंचो कोनश्यान कोनसो पिंजून काडून मतदारांक फोंड्यांचे उदरगती खातीर भाजपा वांगडा, सरकारा वांगडा रावात म्हूण सांगलें. फोंड्यां उदरगत जातली, फोंडेंचो उपजिल्हो हॉस्पिटल जिल्हो हॉस्पिटल करतां, भलायकीची समस्या सोडयतां म्हूण लोकांक विस्वास दिलो. रितेश नायकाक तिकेट दिल्या म्हूण फुर्योज जाल्ल्या भाजपाच्या गटाक थंड केलो. फोंड्यां उमेदवारी सोदपी विश्वनाथ दळवीची समजूत काडली. सगलें केलें. व्हडली सभा घेतली. रवीच्या पुताक, रितेशाक आमदार करताच म्हूण पेंगट बांदलें. मात, रवीच्या पुताचेंय आमदार जावपाचें सपन सध्यातरी भंगलें.
ते वटेन आम आदमी पार्टीनूय फोंड्यां आपलें नशीब पळोवपाचें थारायिल्लें. विरोधकां वांगडा रावनासतना वेगळी चूल मांडली. विधानसभा वेंचणुकेंत खातें उक्तें करतना 2 जागे मेळयले. हो आंकडो तिनाचेर व्हरून आपली ताकद वाडोवपा खातीर तांचीय तयारी जाल्ली. मात, तांचोय अपेक्षाभंग जालो.
ह्या सगल्या घडामोडींत तिनूय पक्षांचे पयशे गेले ते गेलेच. कितल्याश्याच कार्यकर्त्यांचींय बॉल्सां रितीं जालीं. कार्यकर्ते स्वताचे पयशे मोडून मतदारां मेरेन वतात, ताचे फाटल्यान पक्षा विशीं निश्ठा आनी फुडाराची येवजण, दोनूय आसता. मात, कारण नासतना पयशे गेल्ल्यान तांचे उमेदीचेर उदक पडलें.
हे सगले घडणुकेंत वेंचणूक आयोग खलनायक थारलो. ऑक्टोबरांत आमदार रवी नायक हांकां मरण आयिल्लें. पोटवेंचणूक घेवपाची जाल्यार 6 म्हयन्यां भितर घेवपाक जाय असो नेम आसा. तशेंच नव्या आमदाराक वर्साचो तरी कार्यकाळ मेळपाक जाय, असोय नेम आसा. वेंचणूक आयोगान 6 म्हयन्यां भितर पोटवेंचणूक घेवपाक जाय, हो नेम पाळ्ळो. मात, वेंचणूक सामकी उसरां म्हणल्यार 6वो म्हयनो सोंपता तो मेरेन दवरली. हें करतना नव्या आमदाराक वर्सभर तरी मेळपाक जाय, हें पळोवंक ना. फुडली वेंचणूक केन्ना हें खबर नाशिल्लें, कांय पयलो नेम पाळटना दुसरो नेम विसरलें? काय सुसेगाद वृत्तीचो हो परिणाम?
वेंचणूक रद्द जाल्ल्यान गोंयची विधानसभा आतां 39 आमदारांची उरली. तशेंच, सत्तेंत 32, विरोधांत 7 जाण उरले. भाजपा प्रत्येक वेंचणूक खास आंखणी करून लडटा. सगलीं कामां दिस्त करतात. नव्या आमदाराक वर्सभर मेळचें ना, हो हिशेब तांकां कळूं ना? दुसरे वटेन काँग्रेसीची गाडी खंयचे दिकेन वता? हें स्पश्ट ना. म्हत्वाची वेंचणूक, तातूंत नेम-अटी कितें हें पळोवन तांणीय वेंचणूक घेयात म्हूण कसलीच ताकतीक करूंक ना. निमाणें मेरेन उमेदवार जाहीर करपाची तांची वृत्ती फामाद आसा. हें वेंचणुकेंत तांची दिशा स्पश्ट आशिल्ली. मात, वेंचणूक आयोगाच्या फाटल्यान लागून वेंचणूक बेगीन घेवपा खातीर तांणी कांयच केलें ना. न्यायालयांत वचून वेंचणूक बेगीन घेवची, नव्या आमदाराक कायद्यान जितले दीस मेळपाक जाय ते मेळपाक जाय जाल्यार वेंचणूक बेगीन घेवची म्हूण विशय काडूंक ना. तांचे कडेन तर बरो वकील लेगीत आसा. पूण, कसलीच आंखणी नाशिल्ल्यान आनी घाळ राविल्ल्यान तांची एक संद गेली, ती म्हणल्यार विधानसभा वेंचणुके पयलीं आपलें दालें आनीक जड करपाची, आमदारांचो आंकडो तिना वयल्यान चाराचेर व्हरपाची.
आम आदमी पार्टी चमत्कार घडटलो हे आशेन वेंचणुकेंत देंविल्ली. विरोधकांत आसून लेगीत तांणी काँग्रेसीक लागीं घेवंक ना. तांच्या मतान भाजप आनी काँग्रेस एके वटेनूच आसा. तेच खरे विरोधक. तांचे कडेनूय बरे वकील आसात, तेवूय घाळ रावले.
ह्या सगल्यां विरोधकां मदीं आरजी हुशार थारले. तांणी काँग्रेसीक विचार करून मानसीक तेंको दिलो. आपली शक्त वापरूंक ना. म्हणटकच तांचें भरिल्लें उरलें.
काँग्रेसीक फोंड्यां आतां एक खास रणनिती करून फुडें वचपाचो मार्ग उक्तो जाला. वेंचणूक लागीं येताच काँग्रेस आमदार जाहीर करतात. आमदार आनी मेजके फुडारी सोडल्यार तांचें उमेदवार कोण तें स्पश्ट नासता. फोंड्यां उमेदवार स्पश्ट जालो, अशें म्हणूं येता.
मुख्यमंत्री डॉ. प्रमोद सावंत धरून सगल्या सत्ताधारी-विरोधी फुडाऱ्यांक न्यायालयाच्या निर्णयान धपको बसलो. मात, ह्या धपक्यांतूय भाजपाक हो सुखाचो धपको आसा, अशें म्हणूं येता. क्रिकेटींत जशें नेमान एखादी माळ जाता. आदल्या जैतिवंत पंगडान माळ बरोबरींत सोडयली जाल्यार तांचे कडेन आशिल्लो करंड तांचे कडेनूच उरता, म्हणल्यार ते करंड राखता. अशें भाजपाचें जालां. वेंचणूक रद्द जावप म्हणल्यार ही मॅच बरोबरींत सुटली. सगल्या उमेदवारांक ते जिखताच अशें दिसतालें. मात, मॅच बरोबरींत सुटली. आतां सत्तेर आशिल्ल्या भाजपाक फोंड्यां उदरगती खातीर सुत्रां हातांत दवरून काम करपाक मेळटलें. फुडली वेंचणूक ये मेरेन लोकांचो विस्वास कायम दवरपाची संद मेळ्ळी.
मुख्यमंत्री सावंत हांणी आमी दिल्लीं आस्वासनां पाळटले, अशें वेंचणूक रद्द जाले उपरांत म्हणिल्लें. वेंचणूक जावंक नाशिल्ल्यान फुडले 11 म्हयने आमदाराचे बाबतींत फोंडें रितेंच उरतलें. मात, सरकार रितेशाच्या माध्यमांतल्यान लोकांक दिल्ली आस्वासनां पुराय करतलें. रितेश आमदार जायनासतनाय आमदार कसो लोकां मदीं आसतलो, वावुरतलो. लोकांची कामां करतलो.
वेंचणूक ये मेरेन खुबश्यो गजाली एकवेळ बदलत. व्हिनेबिलिटीच्या नांवांन उमेदवार लेगीत बदलूंक शकता. मात, सध्या तरी फोंडें सत्ताधाऱ्यां कडेनूच उरलें. तशें पळोवंक गेल्यार फोंडें रितें ना, थंय आतां सरकाराचो प्रतिनिधी म्हूण रवीचो पूत रितेश आसा.
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
