भांगरभूंय | प्रतिनिधी
त्रिवार जयजयकार….. जयजयकाराच्यो घोषणा दित सगळ्या लोकांनी श्रीरामांक राजप्रासादा कडेन व्हेलो. बऱ्या म्हुर्ताचेर राज्याभिशेक केलो. रामराज्य सुरु जालें. राज्याभिशेकाक आयिल्ल्या सगल्या मानस्तांक श्रीरामान धादोस करून धाडले. मान सन्मान केलो. त्या उपरांत सुग्रीव, अंगद अश्या विरांचोय योग्य सन्मान केलो. तांकां अलंकार दिले. सुग्रीवाक ताणें आपलो पांचवो भाव असो मानलो. हे सगले लोक थोडे दीस अयोध्येंत रावले. श्रीरामान सुग्रीवाक किश्किंदेक वचपाची आज्ञा केली. हें सगलें चालू आसतना हनुमान फुडें आयलो आनी श्रीरामाचे पांय घट्ट धरले आनी भावुक जावन म्हणपाक लागलो.
एकूच वर दिवचो…
प्रभु म्हाका एकूच वर दिवचो।
ह्या चरणांचेर भक्तीभाव म्हजो निश्चल उरचो॥ धृ॥
राघवा तुज्या पांया कडल्यान।
भटकचें न्ही केन्ना हें मन।
रामकथा जो मेरेन आसतली तो मेरेन देह हो आसचो ॥1॥
रामकथा सदां मुखान् आसची।
रामकथा आयकुपाक मेळची।
हे श्रीरामा श्रीराम सोडून छंद म्हाका तो नासचो ॥ 2॥
हे वीरा तुजें चरित्र पावन।
देव अप्सरांनी गांवचें स्तुतीगायन।
म्हाकां तें आयकुपाक देह म्हजो चिरंजीव जावचो॥3॥
मेघां भशेन हांव अविरत सेवन।
जंय आसता थंय श्रीरामायण।
ढगां भशेन शतधारांनी वर्षाव हांवें करचो ॥ 4॥
श्रीरामाचें चितून गायन ।
तेंच रामाचें अपूर्ण चिंतन।
इच्छे प्रमाण म्हजे म्हाका रघुवीर दिसतो ॥ 5॥
जो मेरेन हें जग तो मेरेन संभाशण।
तो मेरेन सदां नवें रामायण।
सप्तस्वरांनी रामकथेचो स्वाद म्हाकां मेळचो ॥6॥
असंख्य आनना असंख्य भाशा।
सगळ्यांची म्हाळा एकूच आशा।
श्रीरामाचो चरित्र गौरव सगळे मेळून करचे ॥ 7॥
लिंग देह हांव धारण करून।
भोंवतलों पृथ्वी आनी आसमान।
वाठारा वाठारान राम कथेचो लाभ म्हाका जावचो॥ 8॥
– उदयबुवा फडके (राष्ट्रीय कीर्तनकार)
97642 43377
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
