भांगरभूंय | प्रतिनिधी
पणजी : शिरगांवचे लयराईची जात्रा २१ एप्रीलाक मनयतले. भाविकांची गर्दी लक्षांत घेवन, उत्तर गोंय जिल्लो प्रशासनान सुरक्षेचे नदरेन खर पावलां उबारल्यांत. फाटल्या वर्सा जात्रे मजगतीं जाल्ले खेटाखेटीचे स जाणाक मरण आयिल्लें. अंदूं प्रशासनान गर्देचें वेवस्थापन आनी स्टॉलांच्या नियोजना खातीर दिवचल उपजिल्लोधिकार्यांच्या अध्यक्षतेखाला आठ वांगड्यांचे विशेश समितीची नियुक्ती केल्या. उत्तर गोंयचे अतिरिक्त जिल्लोधिकारी आनी जिल्लो आपत्ती वेवस्थापन प्राधिकरणाचे मुखेल कार्यकारी अधिकारी प्रवीण परब हांणी हे विशीं अधिकृत आदेश जारी केल्यात.
शिरगांवचे जात्रेक हजारांनी धोंड आनी भाविक येतात. सुवाळ्यांत भाविकांची सुरक्षा धोक्यांत येवची न्हय म्हणून गोंयांतल्या मुंबय उच्च न्यायालयान विशेश दखल घेतिल्ली. न्यायालयाच्या निर्देशा प्रमाण आनी उपरांत नियुक्त केल्ले तथ्य शोध समितीच्या शिफारशींच्या आधारार अंदूंचे जात्रे खातीर विशेश ‘इव्हेंट मॅनेजमेंट प्लॅन’ तयार केला. ह्या आराखड्याची अंमलबजावणी करप सगल्या संबंदीत विभाग आनी भागधारकां खातीर सक्तीचें केलां.
जात्रेच्या मुखेल वाठारांत विक्रेते आनी स्टॉल्सांचेर बंदी घाल्या. रस्त्याच्या मुखेल वहिवाटीचे सुवातेर वा अशीर गल्ल्यांनी स्टॉल लावपाक बंदी आसा. ‘बॉटलनेक’ रस्ते पुरायेन मेकळे दवरपाचे आदेश दिल्यात. विशेश म्हणल्यार, जिल्लो प्रशासनाचे परवानगे बगर पंचायतीक खंयच्याच विक्रेत्याक ना-हरकत दाखलो दिवपाक मेळचो ना. नेम मोडपी विक्रेत्यांचेर फौजदारी कारवाय करपाची शिटकावणी ह्या आदेशांत दिल्या.
जात्रेंतल्या स्टॉल्सांचो आंकडो निश्चीत करपा खातीर आनी तांचे मांडणेक तांत्रीक मंजुरी दिवपा खातीर स्थापन केल्ले समितीच्या अध्यक्षपदार दिवचलचे उपजिल्लोधिकारी आसतले. हे समितींत दिवचलचे उपअधीक्षक, उजो पालोवपी दळाचे अधिकारी, बांदकाम विभागाचे कार्यकारी अभियंता, वीज विभागाचे कार्यकारी अभियंता, देवी लयराई संस्थानाचे प्रतिनिधी, शिरगांवचे सचीव आनी दिवचलचे मामलेदार हांचो आसपाव आसा. ही समिती जात्रेचे सुवातेची पळोवणी करून फाल्यां मेरेन सविस्तर अहवाल जिल्लो प्रशासनाक सादर करतली.
हे समितीचेर स्टॉल्सांचे मांडणी सयत थंय जावपी विजेची वेवस्था, उज्याची सुरक्षितताय आनी अनधिकृत अतिक्रमण काडपाची जापसालदारी दिल्या. भाविकांच्या सुरक्षितते खातीर रस्ते रुंद दवरप आनी आपत्कालीन परिस्थिती जाणवल्यार भायर पडपाचे मार्ग सुरळीत दवरप, हाका प्रशासनान सर्वोच्च प्राधान्य दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
