भांगरभूंय | प्रतिनिधी
राष्ट्रकुल संसदीय संघाच्या परिशदेचें जालें उक्तावण
पणजी : राज्यांनी तांचे मुखार आशिल्ल्या आव्हानांचें रुपांतर संदी मदीं करचें, असो उलो लोकसभा अध्यक्ष ओम बिर्ला हांणी मारलो. बिरेस्तारा पणजे राष्ट्रकुल संसदीय भारत क्षेत्र, विभाग सातच्या परिशदेच्या उक्तावणा वेळार ते उलयताले.ह्या वेळार मुख्यमंत्री डॉ प्रमोद सावंत, राज्यसभेचे उपाध्यक्ष हरिवंश सिंग, सभापती गणेश गांवकार, उपसभापती जोशुआ डिसोझा, महाराष्ट्र विधानसभेचे सभापती राहुल नार्वेंकार, विधान परिशदेचे अध्यक्ष राहुल शिंदे आनी हेर अधिकारी हजर आशिल्ले.
पश्चीम विभागांतल्या गोंय, गुजरात आनी महाराष्ट्र सारकिल्ल्या राज्यांचे एके वटेन दर्या आशिल्ल्यान उदरगतीचेर कांय मर्यादा येताल्यो. मात फाटलीं कांय वर्सां केंद्र आनी राज्य सरकारांनी केल्ल्या यत्नांक लागून दर्यादेगो आशिल्लीं राज्यां आप्या भुगोलीक संकश्टांक तोंड दीत उदरगतीचीं कामां करतात. तिनूय राज्यां पर्यटन, वेपार, सागरी दळणवळण, बंदर उभारणी अश्या जायत्या गजालींच्या माध्यमांतल्यान आपली उदरगत करतात. हेर राज्यांनीय हाचे अनुकरण करपाक जाय.
तांणी म्हणलें, आपल्या राज्यांत खंयच्यो समस्या आसात, खंयचीं आव्हानां आसात हाचो विचार करचो. त्यो सोडोवपा खातीर कायदे, नेम, ध्येय धोरणां करपाक जाय. अशें करतना लोकांचीं, भागधारकांचीं मतां लक्षांत घेवचीं. लोकशायेंत लोकसंवाद, चर्चा ह्या मार्गांचो वापर करून सामुहीक निर्णय घेवप म्हत्वाचें आसता. योग्य ते कायदे केल्यार संकश्टांक तोंड दिवन उदरगत करप शक्य आसा. गरज पडल्यार हातूंत एआय वा हेर आधुनीक तंत्रज्ञानाचो वापर करचो. उदरगत करतना अंत्योदय समाज कल्याण ह्या तत्वांचो विचार करपूय गरजेचें.
आपल्या मतदार संघाची उदरगत करप हीय लोकप्रतिनिधींची नैतीक जापसालदारी आसता. आमदारांनी आपल्या मतदारसंघा खातीर दुरदर्शी रोड मॅप करपाक जाय. मतदार संघांत आदर्श उदरगतीचीं कामां करून दाखोवचीं.
लोकप्रतिनिधींकडल्यान उदरगतीच्या कामां वांगडा रोजगाराच्यो संधी उपलब्ध करून दिवप, लोकांक स्वावलंबी करप हेंय अपेक्षीत आसा. आपल्या देशांत तरणाट्यांचो आंकडो चड आसा. अशा वेळार चडांत चड तरणाट्यांनी संसद, विधानसभेंत येवचे खातीर आमी यत्न करचे अशें ओम बिर्ला हांणी सांगलें.
मुख्यमंत्र्यान म्हणलें, विकसीत भारत २०४७ चें सपन पुराय करपा खातीर तरणाट्या लोकप्रतिनिधींची भुमिका म्हत्वाची. गोंय, महाराष्ट्र, गुजरात ह्या राज्यांनी एकठांय येवन शास्वत उदरगतीचीं कामां करपाक जाय. ह्या राज्यांनी एकमेकांच्यो बर्यो गजाली स्विकारून आपली उदरगत करपाक जाय. गोंय सरकारान विवीध सेवा ऑनलायन करून जनतेचो फायदो केला. वेवसाय सुलभताय केल्ल्यान राज्यांतली गुंतवणूक वाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
