भांगरभूंय | प्रतिनिधी
नवी दिल्ली: मध्य उदेंतांत चालू आशिल्ल्या संघर्शाक लागून भारतान ७ वर्सांच्या अंतरान इराणा कडल्यान तेल खरेदी करप परतून सुरू केल्या. जहाज येरादारीच्या आंकड्यां प्रमाण ‘जया’ नांवाचें टँकर इराणी कच्चें तेल घेवन भारताचे उदेंत दर्यादेगे लागीं पावता.
हो टँकर आदीं गुजरातच्या वाडिनार बंदराकडेन येतालो. हातूंत सुमार ६ लाख बॅरल कच्चें तेल भरिल्लें. मात उपरांत तो चिनाचे वटेन वळ्ळो. त्या वेळार फारीकणीच्या समस्यांक लागून भारता बदला चीनाक वता. पेट्रोलियम मंत्रालयान हो अहवाल चुकीचो आसा अशें सांगिल्लें.
पूण आतां तो परतून भारता कडेन वळ्ळा. सद्या ताचें स्थान मलेशिया लागसार आसा. ह्या सप्तकाच्या निमाणे मेरेन भारताच्या उदेंत दर्यादेगेर पावतली असो समज आसा.
अमेरिकेन भारताक ३० दिसांची सुट दिल्या
२०१८ मेरेन भारत इराणा कडल्यान व्हड प्रमाणांत सवाय तेल विकतें घेतालो. त्या वेळार भारत दर दिसा सुमार ५.१८ लाख बॅरल इराणी तेल आयात करतालो, जें ताच्या वट्ट आयातींतल्या सुमार ११.५% आशिल्लें. पूण अमेरिकेच्या मंजुरी उपरांत भारतान इराणाकडल्यान तेल विकतें घेवप बंद केलें आनी हेर देशांतल्यान पुरवण वाडयली.
हालीं अमेरिकेन ३० दिसांची मर्यादीत सुट दिल्या, जाचे खाला दर्यांत इराणी तेल खरेदी करपाक मेळटा. ही सुट १९ एप्रील मेरेन वैध आसा.
मंत्रालयाच्या म्हणण्या प्रमाण मध्य उदेंतांत पुरवण खंडीत जाल्ल्यान भारतीय शुध्दीकरण कंपनींनी ४० परस चड देशांतल्यान कच्चें तेल घेतलां आनी पेमेंटची कसलीच आडखळ ना.
अस्तंत आशियांत चालू आशिल्ल्या संघर्शा उपरांत तेलाच्या दरांत व्हड प्रमाणांत वाड जाली. हाचो परिणाम जायत्या देशांक जालो. त्याच वेळार भारतीय तेल कंपन्यांकूय लुकसाण जालें. पूण आतां इराणा कडल्यान सवाय तेल मेळ्ळ्यार भारतीय तेल कंपनींक सुटका मेळूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
