भांगरभूंय | प्रतिनिधी
भोंवतेक उमेदवार, वावुरपी बेजार आसात, ते निमण्या खिणाक हें सगलें जालें म्हूण.
एेन वेळार लग्न उरचें, तशें जालें. कोट्यांनी रुपया, मनीस वरां खर्च जाल्लीं आनी राजकी मळाचेर खवदळ घालपी खबर आयली. फोंडेंची पोटवेंचणूक रद्द!! भाजपा आनी काँग्रेसी मदीं मुखेल लडत जावपाची असो सगल्याच जाणकारांचो अदमास आशिल्लो. मात, आतां उमेदवारांक (आनी मतदारांकूय) उणेच णव म्हयने तरी आमदार म्हूण जल्म घेवपाची वाट पळोवची पडटली. हो निवाडो आयलो आनी राज्यभर आरत्यो- परत्यो प्रतिक्रिया आयल्यो. भायल्या प्रसारमाध्यमांनी मात सदचे भशेन हे घडणुकेची रोखडीच दखल घेवंक ना. आसूं. मात ह्या निकालान खूब प्रस्न, दुबाव, तिडक, खोस आनी मौन व्यक्त जालां.
पोटवेंचणुकेक आव्हान दिवपी याचिका प्रितम हरमलकार आनी अंकिता कामत हांणी गोंयांतल्या मुंबय उच्च न्यायालयांत दाखल केल्ल्यो. विधानसभा वेंचणुकेक एक वर्सा परस उणो काळ उरला आसतना पोटवेंचणूक घेवपाची गरज ना, असो तांणी युक्तीवाद केल्लो. याचिका करपी खंयच्या राजकी पक्षा कडेन संबंदीत आसात हाचो सोद सध्या कांय जाण घेतात. थोड्यांच्या मतान, पोटवेंचणूक जाहीर करतना विधानसभेचो कितलो कार्यकाळ उरला तें वेंचणूक आयोगान तपासपाक जाय आशिल्लें. कारण ही भुरग्यांच्या क्रिकेट क्लबाची वेंचणूक न्हय! नागपूर वेंचणुके वेळार असोच निकाल आयिल्लो. ताचेरूच आदारून उच्च न्यायालयान फोंडेंची वेंचणूक रद्द केल्या. आयोगाक हें खबर नाशिल्लें काय, विसरले? काय आनीक कसलें कारण बी आसा?
हाचे फाटल्यान सरकार पक्ष आसा, असो थोड्यांनी कॅमेऱ्या मुखार आरोप केला. पोटवेंचणूक आदले दीस रद्द जाल्या, म्हणटकच ती आतां चड करून विधानसभेचो कार्यकाळ सोंपतकच जातली. खरें म्हणल्यार ती फाटल्या 15 डिसेंबरा पयलीं जावंक जाय आशिल्ली. काँग्रेसीचो उमेदवार जिखपाची चड शक्यताय आसा, अशें दिशिल्ल्यान ही वेंचणूक रद्द केल्या, अशें कांय जाण म्हणटात. मात हें करतना आपूण न्यायालयाचो अपमान करता, हाचें तांकां भान उरूंक ना.
न्यायालयाच्या निकालाचेर संविधानीक मर्यादेंत रावन टिका करूं येता. विश्लेशण, मतूय मांडू येता. पूण निर्णयाच्या हेतूचेरूच दुबाव उक्तावप, आरोप करप चुकीचें. पूण, हो निवाडो थोडे दीस बेगीन आयिल्लो जाल्यार पक्षांक फुडल्यो हालचाली करपाक वेळ मेळपाचो, अशेंय जाणकारांक दिसता. आतां पोस्टल मतदान जालां. मतदानाची तयारीय जाल्ली. म्हणटकच ह्या निकालाचेर वेंचणूक आयोग कितें पावलां उखलता, तें पळोवपाचें. मतदानाक कांय वरां उरिल्लीं आसतना वेंचणूक रद्द जावप, हें लोकशाय प्रक्रिया आनी लोकांच्या विस्वासा खातीर गंभीर गजाल. न्यायालयान रिप्रेझेंटेशन आॅफ द पीपल्स अॅक्ट 1951 मदल्या तजविजी प्रमाण 1 वर्सा परस चड काळ उरूंक ना, ह्या मुद्याचेर पोटवेंचणूक रद्द केल्या. म्हणटकच कायद्यान हो निर्णय चुकीचो ना. तो वादग्रस्त मात थारला. दुसरे वटेन वेंचणूक आयोगान कायदो, वेळ, कागाळी, केशी बी पळोवनूच वेंचणूक जाहीर करपाक जाय. दोनूय याचिकादारांक खबर आसा तें आयोगाक खबरूच नाशिल्लें? काय ही प्रशासकी त्रुटी? मतदार यंत्रणेचेर जाल्ल्या खर्चाचें कितें? थोड्या मतदारांक ‘मत मानधन’ पसून मेळ्ळां आसतलें. भोवतेक उमेदवार, वावुरपी बेजार आसात, ते निमण्या खिणाक हें सगलें जालें म्हूण.
आतां वेंचणुके मेरेन इत्सूक उमेदवारांनी (हेच उरतात काय दुसरे येतात तें पळोवपाचें) आनी तांच्या पक्षांनी दिल्लीं आस्वासनां पुराय करपाचे दिशेन यत्न करचे. खास करून सत्ताधारी पक्षाक दिल्लीं आस्वासनां पुराय करपाची चड संद आसा. विरोधकूय फाॅर्मांत आसात. हो राजकी मळा वयलो काळो दीस अशें थोड्यांक दिसता, तर उरिल्ल्यांक तो भगवो दिसता आसुये. पूण येवपी वेंचणुकेचो दीस रंगीबेरंगी आसचो आनी ह्या ‘विकास रंगां’त फोंडें मतदारसंघ न्हावन वच्चो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
