भांगरभूंय | प्रतिनिधी
न्या. रिबेलो हांचे मुख्यमंत्री डॉ. सावंत हांकां पत्र
पणजीः ज्या अधिकारांचो वापर करुन हरमल, शिरदोण आनी सांखळे वाठारांत कलम ३९ (अ) प्रस्ताव खिणाभितर रद्द केल्यात त्याच अधिकारां वरवीं गोंयभर जमीन रुपांतरण प्रक्रिया थांबोवची तशेंच ह्या कलमा खाला नवी परवानगी दिवप बंद करचें, अशी मागणी निवृत्त न्या. फेर्दीन रिबेलो हांणी मुख्यमंत्री डॉ. प्रमोद सावंत हांकां पत्रा वरवीं केल्या.
आनीक सोंसू नेजो (इनाफ इज इनाफ) हे चळवळीचें फुडारपण करपी न्या. रिबेलो हांणी मुख्यमंत्र्याक नवें पत्र बरोवन परत एक फावट कलम ३९ (अ) विशयाचेर परत लक्ष ओडला.
आपल्या पत्रांत तांणी मुख्यमंत्र्यांक सांगलां, हरमल, शिरदोण आनी सांखळे वाठारांत ज्या अधिकारांचो वापर करून जमीन रुपांतरण थांबयल्लें, त्याच अधिकारांचो वापर पुराय गोंयभर जावचो. कलम ३९ (अ) सकयल चालू आशिल्ली सगली जमीन रुपांतरणां बंद करचीं. तशेंच ह्याच कलमा सकयल नवी परवानगी दिवची न्हय. तशेंच विरोधी आमदारांनी मांडिल्लें जमीन राखण विधेयकाचेर विधानसभेंत चर्चा जावन हे विधेयक समंत जायना तो मेरेन हें निर्बध लागू दवरचे, अशी मागणी तांणी केल्या.
सरकारान जमीन महसूल संहिता, कोमुनिदाद कायदो, जमीन आनी पारंपरिक मालकी हक्क सांबाळपी हेर कायदो गोंयची जमीन संसाधना आनी समुदायाचे हक्क राखपा खातीर आसात. मात सरकारान हें जमीन रुपांतरण करपाचें पावल घेवन कायदेशीर फटवणूक केल्ल्याचो आरोप न्या. रेबेलो हांणी पत्रांत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
