भांगरभूंय | प्रतिनिधी
एआय धोरणा खातीर भागधारकांची सुचोवणी
पणजीः सुमार ५७ भागधारकांच्या सुचोवण्यांचो आस्पाव करून, गोंयच्या कृत्रीम बुद्धीमत्ता (एआय) धोरणा अस्तित्वांत हाडपाच्या कामाक गती मेळ्ळ्या. खासा करून भागधारकांनी ’भाषिणी’च्या जोडपालवान कोंकणी भाशेचो एआय मॉडेल विकसीत करपाचो एक खाशेलो उपक्रम सुचयला. हाका लागून प्रगत तंत्रज्ञान गोंयकारां खातीर सोंपें आनी थळाव्या क्षेत्रा संदर्भांत उपेगी थारतलें.
गोंयच्या एआय धोरणाक निमाणें रुप दिवपा खातीर पर्यटन भवनांत म्हायती तंत्रगीन्यान खात्यान भागधारकांची बसका आपयल्ली. खात्याचे संचालक कबीर शिरगांवकार हांच्या फुडारपणा खाला जाल्ले हे बसकेंत एआय धोरणाचो मसुदो भागधारकां मदीं मांडून तांचेकडल्यान सुचोवण्यो मागयल्यो. प्रशासन, शिक्षण आनी उद्देग मळार बदल घडोवन हाडपा खातीर एक व्यापक आराखडो तयार जावन हातूंत प्रत्यक्ष वापराचेर भर मेळटलो. ह्या आराखड्यांत एआय- आधारीत नागरीक सेवा, सरकारी चॅटबॉट, वेगवेगळ्या खात्यांनी एआयचो वापर आनी हेर गजालींचो आसपाव आसतलो, अशी म्हायती अधिकार्यान दिली.
मार्च म्हयन्यांत पयलो मसुदो उजवाडाक आयले उपरांत सरकारान फुडले हालचालीक नेटा दिला. उद्देग संस्था, शिक्षण संस्था आनी राश्ट्रीय एआय उपक्रमांकडल्यान सल्ले घेवन एक व्यापक सल्लामसलत प्रक्रिया राबयल्या. हें प्रस्तावीत धोरण म्हायती तंत्रज्ञान मंत्री रोहन खंवटे हांच्या मार्गदर्शना खाला ’एआय मिशन २०२७’ ह्या उपक्रमाक जोटिल्ले आसा. मंत्र्यांनी १०० दिसांची मुजत दिल्या आनी फुडल्या कांय सप्तकां भितर धोरणांक निमाणें रूप दिवपा खातीर आनी ताचे अंमलबजावणीचे मार्ग थारतले.
मजगतीं, उद्देग क्षेत्रांतल्या वांगड्यांनी मंत्री रोहन खंवटे हांची भेट घेतली आनी एआय क्षेत्रांतल्या स्टार्टअप्स मुखार आशिल्ल्या आव्हानांचेर चर्चा केली. निधीची उपलब्धताय, कुशळ मनुष्यबळाची गरज आनी पूरक नियामक पर्यावरणाची गरज असले मुद्दे तांणी मांडले. मंत्र्यांनी हे मुद्दे निमण्या धोरणांत आस्पावन घेवपाचें उतर दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
