भांगरभूंय | प्रतिनिधी
पणजी : गोंयच्या मुंबई उच्च न्यायालयान फोंडें पोटवेंचणूक रद्द केली. फोंडें विधानसभा पोटवेंचणुकेच्या मतदानाक फकत एक दीस आसतना हो निर्णय घेतलो.
सध्या विधानसभेचो पांच वर्सांचो कार्यकार सोंपपाक एक वर्सां परस उणो काळ आशिल्ल्याचें सांगून फोंडेंची पोटवेंचणूक रद्द करची, हे खातीर न्यायालयांत याचिका दाखल केल्ली. ताचेर दोनूय वटेनचे युक्तीवाद आयकून घेतले उपरांत न्यायालयान वेंचणूक रद्द करपाचो आदेश दिलो.
फाल्यां फोंडें पोटवेंचणुके खातीर मतदान जावपाचें आशिल्लें. वेंचणुकेंत भाजपा वतीन रितेश नायक, कॉंग्रेस पक्षा वतीन केतन भाटीकार जाल्यार आम आदमी पार्टी वतीन गीतेश नायक हे उमेदवार वेंचणुकेंत देंविल्ले. फाटल्या कितल्याशाच दिसां सावन पोटवेंचणुके खातीर प्रचार चालूच आशिल्लो. पोस्टल मतदानूय जाल्लें. घराघरांनी प्रचार, कोणसो बसका आनी जाहीर सभा अशे तरेन उमेदवारांनी प्रचार चलयिल्लो. भाजपचे गोंय प्रभारी तशेंच महाराष्ट्राचे मुख्यमंत्री देवेंद्र फडणवीस हांची जाहीर सभाय जाल्ली. मात, आतां वेंचणूक रद्द जाल्ल्यान इतले दीस केल्ले प्रचार आनी यत्न पेड्यार जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
