भांगरभूंय | प्रतिनिधी
गोंयांतूय कोणाक कोणाचोच भंय उरूंक नाशिल्ल्याचें बर्च आनी परवान्यां बगर चलपी वेवसायां वयल्यान सिद्ध जालां.
अामचें गोंय पर्यटन थळ. लाखांनी पर्यटक दरवर्सा येतात. तांच्या जिवार हजारांनी वेवसायीक जोडटात. हातूंतले बरेचशे भायले. कायदेशीर तरेन वेवसाय करप्यांक हरकत घेवपाचो कोणाकूच अधिकार ना. मात, बेकायदेशीर पद्दतीन, गैरप्रकारान आमच्या पर्यटन मळाचेर जे धंदे चलतात, ताचें कितें? तांचेर नियंत्रण हाडचे परस, ते पुराय नश्ट करपाक जाय. गुन्यांवकारांक तडिपार करतात, तशे त्या वेवसायिकांक कायमचे गोंया भायर धांवडावंक जाय. पयरूच हरमला स रेस्टाॅरंण्टांक उजो लागलो. तांचे कडेन उजो पालोवपी दळाची एनओसी नाशिल्ली, अशें उक्तडार आयलां. हणजूण्यां पोरूं डिसेंबरांत बर्च बाय रोमियो लेन क्लबाक उजो लागून 25 जाणांक मरण आयिल्लें. हे घडणुकेन गोंयचें नांव संवसारांत बदनाम जातकच सरकारी यंत्रणा खडबडून म्हणटात तशी जागी जाल्ली आनी राज्यांतल्या दर्यादेगे वयल्या हाॅटेलांचे, पब, क्लबांचे परवाने तपाशिल्ले खंय!!!! भोवतेकां केडन ते नाशिल्ले. आतां हरमला रेस्टाॅरंण्टांक उजो लागला, तांचे कडेनूय कांय परवाने नात, अशें कळ्ळां. आतां खंयचो अधिकारी निलंबीत जाता तें पळोवपाचें. असल्या घडणुकांक जापसालदार आशिल्ल्या लोकप्रतिनिधींचींय फितां कापपाक जाय. म्हणजे तांचे सगले भत्ते, मानधन, कार्यावळी, फायलींचेर सय मारप… सगलें – सगलें बंद. ताणें घरा बसप. निर्दोश सिद्ध जालो जाल्यारूच लोकप्रतिनिधीक परत कदेल! हालींच कांय आगळे कायदे तयार जाल्यात, तातूंत हो एक कायदो आसचो. पक्षांतर करून अपात्र थारिल्ल्या आमदारांक हिमाचल प्रदेशांत आतां पेन्शन मेळची ना खंय. गोंयांतूय कोणाक कोणाचोच भंय उरूंक नाशिल्ल्याचें बर्च आनी परवान्यां बगर चलपी वेवसायां वयल्यान सिद्ध जालां.
कसलीय गजाल चालीक लागपाक दुर्घटनां घडपाक जाय, अशें म्हणटात. बर्च उपरांत सगले जागे जाले. आतां हरमल दुर्घटनेक लागूनय जाग आयली. हरमल वाठारांतल्या सगल्या रेस्टाॅरंण्टां, हाॅटेलां, क्लबांची फायर एनओसी तपासपाचो आदेश जिल्होधिकाऱ्यान दिल्या. ती नासल्यार फायर ब्रिगेडीक गुन्यांव नोंद करपाक सांगलां. शेनवारा फांतोडेर हो उजो लागलो. रेस्टाॅरंण्टां कडेन तो पालोवपाक कसलीच उपकरणां नाशिल्लीं. हाका संबंदीत रेस्टाॅरंण्ट धनीच जबाबदार न्हय, तर तांकां परवाने नासतना हो वेवसाय करपाक दिवपीय तितलेच जबाबदार. तांचेरूय कारवाय जावंक जाय. खंयचोय वेवसाय करपाक कितें लागता, तें पयलीं जाणून घेवपाचें आसता. मागीर ती प्रक्रिया जाले उपरांत वेवसाय सुरू करप. पूण कांय सरकारी प्रक्रिया घडये किचकट आसतल्यो, कांय जाण ते खातीर चार पयशे मेळत म्हूण आडमेळींय हाडटात आसतले? ताकाच लागून बरेच फावट शाॅर्टकट मार्ग आपणावप जाता. थोडे तर सरळ खिरापत वाटून परवाने घेतात वा गुपचूप बेकायदेशीर वेवसाय चलयतात. बर्च दुर्घटणे उपरांत असल्या बऱ्याच वेवसायांक दंड घाला, टाळेंय लायलां. राज्यांतल्या, खास करून भायल्यांनी हांगाच्या दर्यावेळांचेर, दर्यादेगांचेर सुरू केल्ल्या वेवसायांची सरकारान तपासणी करून कोण कायदेशीर, कोण बेकायदेशीर तें सोडून काडचें. गुन्यांवकार सांपडल्यार फक्त तांचेरूच न्हय, तर पंचायत, पालिका, परवाने दिवपी खात्यांचीय चवकशी करची. कारण पंचांक हाता कडेन धरून थोडे वेवसायीक बेधडक कामां करतात. थळावेय नव्यो कुडी काडून भाड्यान दितात, खाणावळ, ल्हान गाडे घालतात, घरांतूच कूड काडून स्वताच वेवसाय सुरू करतात. हरकत ना. पूण सगलें कायदेशीर जावंदी. तशें करिना जाल्यार बंदखणींत खडी फोडपाक वच्चें पडटलें, हाची भिरांत लोकांक दिसुंदी. फाटीं एके पंचायतींत घुसून सेक्रेटरीक बडोवपाचो प्रकार घडिल्लो, ताचे फाटल्यानूय पयश्यांचो वेव्हार आशिल्लो खंय! पर्यटन खात्यान सगलें गंभीरपणान घेवंक जाय. कारण आप, पाप, भटाच्या माथ्यार म्हणी प्रमाण सगलें ह्या खात्याक भोगचें, सोंसचे पडटा. ताचो राज्याचे तिजोरेचेरूय परिणाम जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
