भांगरभूंय | प्रतिनिधी
भांगरभूंय । प्रतिनिधी
पणजीः राज्य सरकाराच्या गोंय स्टार्टअप एक्सीलरेटर उपक्रमान एक म्हत्वाचो पांवडो हुपलो. ह्या उपक्रमा खाला 160 परस चड स्टार्ट ॲप्सांनी अर्ज केल्लें. तातुंतल्या 45 स्टार्ट ॲप्साची निवड जावन तांकां फाटले सप्तकांत बिझनेस मॉडेल सुदारप, उत्पादन-बाजारपेठेचो आस्पाव करप, तंत्रगिन्याचे एकत्रीकरण करप, वाड करपाच्यो धोरणा आनी गुंतवणूकदारां खातीर सज्जता अशा साबार विशयांचेर सत्रां घडोवन हाडली.
राज्याच्या स्टार्टअप परिसंस्थेक घटमूट करपाच्या उद्देशान गोंय सरकाराच्या माहिती तंत्रज्ञान, इलेक्ट्रॉनिक्स आनी कोम्युनिकेशन संचालनालयान स्टार्टअप आनी आयटी प्रमोशन सेला वरवीं गोंय स्टार्टअप एक्सीलरेटर हो उपक्रम सुरू केला.
12 फेब्रुवारी 2026 दिसा सुरू जाल्ल्या ह्या उपक्रमान फाटल्या 5 म्हयन्यांच्या काळांत एक्सीलरेटर कार्यावळ, स्टार्टअप्सक मार्गदर्शन, बाजारपेठेंत प्रवेश आनी वाडीच्यो संद वाडवोपा खातीर कार्यवळी आंखल्या.
ह्या पांवड्याचो एक भाग म्हूण, 30 आनी 31 मार्च 2026 दिसा मजगतीं ‘डेमो डे’ जालो, जातूंत सुमार 41 स्टार्टअप्सांनी आपले प्रकल्प सादर केलें. स्टार्टअप्सांनी तांच्यो कल्पना, नविनीकरण आनी उपक्रमा वरवीं जाल्ली उदरगत विशीं म्हायती दिली. सादरीकरणा उपरांत, फुडल्या पांवड्या खातीर 26 स्टार्टअप्सची निवड जाली. ही निवड गुंतवणूकदार आनी उद्येग क्षेत्रांतल्या तज्ञांच्या एका खास ज्युरी पॅनलान केली.
हे विशीं अदीक म्हायती दितना म्हायती तंत्रगिन्यान खात्याचें संचालक कबीर शिरगांवकार हांणी सांगलें, स्टार्टअप्सांक सुरळीत प्रक्रिया आनी सेगीत आदार दिवपा खातीर गोंय स्टार्टअप एक्सीलरेटर राज्यांतल्यो पयलोच उपक्रम आसा. स्टार्टअप्साचो प्रतिसाद आनी तांचो दर्जो गोंयच्या तरणाट्यां मदली ऊर्जा दाखयता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
