भांगरभूंय | प्रतिनिधी
नवी दिल्ली, खबरां संस्थाः केंद्रीय समाजीक न्याय आनी अधिकारिता मंत्रालयाच्या म्हणण्या प्रमाण देशभरांत 14 वर्सां सकयलीं फकत 45,296 भुरगीं भिक्षावृत्तीत गुंतिल्ली आसात. तातूंतली उत्तर प्रदेशांत सगळ्यांत चड 10 हजार भुरगीं भीक मागतात, जाल्यार राजस्थानांत ह्या भुरग्यांचो आंकडो 7 हजारां परस चड आसा. ही म्हायती 2011 वर्साचे जनगणनेच्या आदाराचेर दिल्या. राज्यसभेंत अतारांकित प्रस्नाक जाप दितना ही म्हायती दिली.
भारताच्या महारजिस्ट्रारच्या संकेतथळार मेळपी म्हायतीचेर आदारून हे आंकडे दिल्यात अशें राज्यमंत्री बीएल वर्मा हांणी सांगलें. अशा भुरग्यांच्या पुनर्वसनाची येवजण 23 ऑक्टोबर 2023 दिसा सुरू जाली आनी ते उपरांत 2653 भुरग्यांचें पुनर्वसन जालां. तातुंतल्या 1507 भुरग्यांक तांच्या आवय-बापूय वा कुटुंबांच्या ताब्यांत दिलें, 305 भुरग्यांक आंगनवाडी केंद्रां कडेन दिलें, 206 भुरग्यांक बाल कल्याण समितीच्या ताब्यांत दिलें. तेच बरोबर 625 भुरग्यांक शाळांनी प्रवेश दिलो.
दोन केंद्रशासित प्रदेशांत एकूय भिकारी ना
केंद्रशासित प्रदेश दादरा आनी नगर हवेली आनी अंदमान आनी निकोबारांत एकूय भिकारी ना अशें समाजीक न्याय आनी सक्षमीकरण खात्यान आपल्या अहवालांत सांगलां. जाल्यार लक्षद्वीप आनी सिक्किमांत दरेकीं एक भुरगो, मिझोरामांत स, दमन आनी दीव आठ आनी पुद्दुचेरींत णव भुरगीं भिक मागतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
