नवी दिका दाखोवपी वेंचणुको ?

भांगरभूंय | प्रतिनिधी

येता त्यो वेंचणुको फक्त सत्ता बदल थारावपी नात जाल्यार देशाच्या फुडारांतल्या राजकी प्रवाहाक दिका दिवपी थारतल्यो. ताका लागूनच ह्या वेंचणुकां कडेन पुराय देशाचें लक्ष लागून आसा.

एक दोन दिसांत देशांत वेंचणुकांचो म्हयनो सुरू जाता, आनी ताचे बराबरूच राजकी वातावरणूय तापूंक लागलां. गोंयांत फोंडें मतदारसंघा सावन ते महाराष्ट्रांतल्या बारामतीच्या पोटवेंचणुके मेरेन कांय म्हत्वाच्या सुवातांचेर जावपी वेंचणुकां कडेन थळाव्या पांवड्यार लक्ष लागिल्लें आसलें तरी आसाम, केरळ, तामीळनाडू आनी अस्तंत बंगाल ह्या राज्यांतल्यो विधानसभा वेंचणुको, तशेंच पुदुच्चेरी ह्या केंद्रशासीत प्रदेशांतल्यो वेंचणुको देशाचे राजकी दिशेक आकार दिवपी थारतल्यो. ताकाच लागून ह्या म्हयन्याचें राजकी म्हत्व विशेश अशें थारता आनी पुराय देशाचें लक्ष ह्या निकालां कडेन लागून उरप सभावीक आसा. गोंयचे कृशी मंत्री रवी नायक हांकां आयिल्ल्या मरणाक लागून रित्या जाल्ल्या फोंडें मतदारसंघांत 9 एप्रील दिसा मतदान जाता. जाल्यार महाराष्ट्रांत उपमुख्यमंत्री अजीत पवार हांच्या बारामती मतदारसंघांत 23 एप्रीलाक मतदान जातलें. ह्यो दोनूय पोटवेंचणुको सत्ताधारी भाजपा खातीर प्रतिश्ठेच्यो जाल्यात. चड करून विरोधी महाविकास आघाडीतले भितरले मतभेद लक्षांत घेत जाल्यार हें वातावरण भाजपाच्या फायद्याचें थारपाची शक्यताय राजकी अभ्यासक उक्तायत आसात आनी सद्याचे परिस्थितींत तें सत्य आसा अशेंच दिसून येता.
गोंयांत काँग्रेस भाजपाक खर झूज दिवपाचो यत्न करीत आसली तरी आम आदमी पक्ष, गोवा फॉरवर्ड आनी आरजीपी ह्या हेर पक्षांची भुमिका स्पश्टपणान एकवटीत अशी दिसना. उरफाटें आम आदमी पक्षान स्वताचो उमेदवार उबो करून भाजपाक अप्रत्यक्ष रितीन मजत केल्ल्याचें चित्र दिसता. गोवा फॉरवर्ड आनी आरजीपीचे फुडारी प्रचारा पसून पयस आशिल्ल्याचे संकेत मेळत आसात. एके वटेन भाजपा आड एकवटाची भाशा करीत आसतना, प्रत्यक्षांत मात विरोधकां मदीं विस्कळीतपणा दिसून येता. हाका लागून येता ते विधानसभा वेंचणुकेंत कसलें चित्र उबे रावतलें हाची झलक आतांच मेळटा.
सामको होच प्रकार महाराष्ट्रांतल्या बारामती पोटवेंचणुकेंतूय दिसून येता. काँग्रेस, राष्ट्रवादी (शरद पवार गट) आनी उद्धव ठाकरे हांची शिवसेना हांचे मदलो मतभेद उक्तेपणान मुखार आयला. काँग्रेसीची विनंती भायरावन उद्धव ठाकरे हांणी महायुतीच्यो उमेदवार सुनेत्रा पवार हांकां तेंको दिला. जाल्यार शरद पवार हांची भुमिका अजूनय दुबावाची आसा. परिणाम काँग्रेसीन खंयच्याच चेपणाक बळी पडनासतना स्वताचो उमेदवार रिंगणांत देंवयला. ह्यो घडामोडी महाविकास आघाडीत फूट पडपाची शक्यताय दिसून येता.
राज्यांच्या विधानसभा वेंचणुकां कडेन पळयत जाल्यार आसामांत भाजपाची स्थिती तुळेन घटमूट आशिल्ल्याची दिसता आनी परतून सत्ता मेळोवपाक तांकां आडखळी येतल्यो अशें तरी दिसून येना. केरळ आनी अस्तंत बंगालांत मात भाजपान विरोधकां मुखार गंभीर आव्हान उबें केलां. तामीळनाडूंत व्हड बदल जातलो अशें सद्या तरी दिसून येना तरिपूण राजकी समिकरणां सूक्ष्म पांवड्यार बदलत आसात.
अस्तंत बंगालांतल्यो वेंचणुको सदांच तापिल्ल्या वातावरणांत जातात, आनी ही वेंचणूक लेगीत ताका आडवाद ना. मुख्यमंत्री ममता बॅनर्जी हांणी भाजपा मुखार बागोवची ना असो निश्चेव करून मैदानांत प्रवेश केला. मात अंदू संघर्श अदीक खर आनी भोवआयामी जाला. राष्ट्रपतींचे कार्यावळींत बदल, ममता बॅनर्जी हांचेर राष्ट्रपतींचो अवमान केल्ल्याचे आरोप, ताचेर केंद्र सरकाराची खर प्रतिक्रिया, राज्यपालांची बदली, विवीध कल्याणकारी येवजण्यो आनी मतदार वळेरीतली कथीत घुसखोरांचीं नांवां वगळपाचो मुद्दो ह्या सगल्या गजालींक लागून बंगालचें राजकारण आनीक तापलां. वेंचणुकेच्या तोंडार जाहीर जाल्ल्या येवजण्यांकूय राजकी समिकरणांचेर प्रभाव घाला. ममता बॅनर्जी हांणी युवा साथी येवजणे खाला बेरोजगार तरणाट्यांक म्हयन्याक सुमार 1500 रुपयांचो भत्तो दिवपाची घोशणा केल्या. हे येवजणेचो लाव सुमार एक कोटी तरणाट्यांक मेळटलो असो दावो करतात. हे घोशणेक लागून तरणाट्या मतदारांचेर प्रभाव पडपाची शक्यताय न्हयकारूं येना.
मजगतीं, मतदार वळेरेंतल्या कथीत घुसखोरांचो मुद्दोय परतून वयर सरला. शीम वाठारांतल्या बांगलादेशांतल्यान आयिल्ल्या व्यक्तींचीं नांवां मतदार वळेरेंत आशिल्ल्याचो आरोप भाजपा सेगीत करीत आसा. हजारांनी नांवां वगळिल्ल्याची म्हायती मुखार आयले उपरांत हो मुद्दो आनिकूय गाजूंक लागला.
भाजपाचे फुडारी, मतदार वळेरी शुद्धीकरण लोकशाये खातीर आवश्यक आसा. पूण तृणमूल काँग्रेसीन हे प्रक्रियेचेर राजकी हेतूचो आरोप केला. ताका लागून हो विशय फक्त प्रशासनीक उरनासतना राजकी संघर्शाचें प्रभावी हत्यार जालां. हे फाटभुंयेर आरोप-प्रत्यारोपांक नेट आयला आनी बंगालचें वातावरण धवळून गेलां. मात निमाणो निर्णय हो मतदारांच्या हातांतूच आसा. मतदार विकासाच्या आस्वासनांक प्राधान्य दितात काय राजकी आरोपांचेर निकाल निंबून आसतलो हें रोखडेंच कळटलें.
सद्या तृणमूल काँग्रेस सत्ता विरोधी ल्हाराक तोंड दीत आसा जाल्यार भाजपाय राज्यांत घटमूट पांय रोवपाचो यत्न करीत आसा. ताका लागून ही वेंचणूक दोनूय पक्षां खातीर अस्तित्वाची लडाय जाल्या. ह्या संघर्शात अनपेक्षीत वळण येवपाची शक्यताय न्हयकारूं येना. अस्तंत बंगालांत जैत मेळत जाल्यार भाजपा खातीर ती एक व्हड राजकी कामगिरी थारतली. जाल्यार केरळ आनी तामीळनाडूंत पक्षाचे प्रतिनिधी वाडोवप हेंच तांचे मुखेल उद्दिश्ट दिसून येता.
एकूणच, येता त्यो वेंचणुको फक्त सत्ता बदल थारावपी नात जाल्यार देशाच्या फुडारांतल्या राजकी प्रवाहाक दिका दिवपी थारतल्यो. ताका लागूनच ह्या वेंचणुकां कडेन पुराय देशाचें लक्ष लागून आसा.

वामन प्रभू
9823196359