भांगरभूंय | प्रतिनिधी
आमदार प्रवीण आर्लेकार हांची मुख्यमंत्र्यां कडेन मागणी
पणजी : सिंधुदुर्ग जिल्ह्यांतल्यान मोपा, तांबोशें वाठारात येवपाची ओंकार हतयाची ही तिसरी खेप आसा. हाचे पयलीं गोंयां भायर धावडले उपरांत आतां तो परत येवन शेताचें लुकसाण करपाक लागला. शेती, बागायतीचें रक्षण करपा सयत फुडलो अनर्थ जावचो न्हय म्हूण हत्तीचो कायमस्वरूपी बंदोबस्त करपाची मागणी पेडणेंचे आमदार प्रवीण आर्लेकार हांणी केल्या. मुख्यमंत्री डॉ. प्रमोद सावंत आनी राना खात्याचे मंत्री विश्वजीत राणे हांचे कडेन फोनाचेर चर्चा केल्या, अशें आमदार प्रवीण आर्लेकार हांणी सांगलें.
ओंकार हती मोपा, तांबोशें वाठारांत येवपाची ही पयलीच खेप न्हय. हाचे पयलींय ह्या वाठारांत येवन ताणें शेती, बागायतीचें लुकसाण केलां. मनशांचेर लेगीत ताणें हल्लो केला. हाका लागून ह्या विशयाचेर गंभीरतायेन विचार करपाक जाय. पयलीं भशेन ताका धांवडलो जाल्यार कांय दिसांनी तो परतून गोंयचे हद्दींत येतलो. फुटबॉलाचो खेळ बंद जावपा खातीर ताचो कायमस्वरूपी बंदोबस्त करपाक जाय. ताका धरून सुरक्षीत थळांचेर पावोपाची गरज आसा, अशें आमदार प्रवीण आर्लेकार हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
