भांगरभूंय | प्रतिनिधी
कारवाय करपाची खात्यांक शिफारस
पणजी : हरमल हांगा शेनवारा फांतोडेर लागिल्लो उजो हो बर्च बाय रोमीओ लेन क्लबाक लागिल्ल्या उज्या सारकोच प्रकार आशिल्ल्याची बाब उपजिल्होधिकार्यांच्या अहवाला उपरांत स्पश्ट जाल्या. उजो शॉर्ट सर्कीटाक लागून लागला आसलो तरी रेस्टॉरंट धनयांची घाळपणां हें लेगीत कारण आसा, अशेंय अहवालान म्हणलां. जिल्लोधिकारी कार्यालयांतल्या गोपां कडल्यान ही म्हायती मेळ्ळी.
ज्या रेस्टॉरंटांक उजो लागलो तांचे कडेन फायर एनओसी नाशिल्ली, उजो पालोवपा खातीर फायर एक्स्टीग्युशर वा कसलीच तात्पुरती लेगीत वेवस्था नाशिल्ली. घरां फाटले वाटेन वाडोवन रेस्टॉरंटां केल्यांत. दर्यादेगेचेर अतिक्रमण जावन सीआरझेड कायदो मोडप जाता. पंचायतीन पळोवणी करून अतिक्रमणा आड कायद्या प्रमाण कारवाय करची, अशी शिफारस आसा. रेस्टॉरंटा कडेन लायटीच्यो सरयो आशिल्ल्यान वीज खात्यान गरजेचे सुरक्षेचे उपाय करचे. रेस्टॉरंटांकडेन एफडीएचे परवाने नात तशेंच कसलेच तरेचें शुल्क भरिल्ल्याची कागदपत्रां धनयां कडेन नात. उपजिल्लोधिकार्यांनी चवकशी करपा सयत गरजेची कारवाय करपाविशींचीं पत्रां एफडीए तशेंच पर्यटन खात्याक बरयल्यांत.
रेस्टॉरंटांक लागिल्ल्या उज्याची चवकशी करून अहवाल सादर करपाचे आदेश उत्तर गोंय जिल्लोधिकार्यांनी पेडणें उपजिल्होधिकार्यांक दिल्लो. हे प्रमाण अहवाल सादर जाला.
हरमल हांगा शेनवारा फांतोडेर उजो लागून रेस्टॉरंटांचे लाखांनी रूपयांचें लुकसाण जालें. ही घडणूक धोकादायक आसा. अशा घडणुकांक लागून जिणेक लेगीत धोको निर्माण जावप शक्य आसा.
उजो लागिल्ल्या रेस्टॉरंटांकडेन आशिल्ले परवाने, प्रमाणपत्रां तशेच एनओसीची तपासणी पेडणें उपजिल्होधिकार्यांनी केली.
शेनवारा फांतोडेर विजेच्या खांबांचेर स्पार्क जावन सकयलोवाडो – हरमल हांगा उजो पेटलो. हातूंत ६ रेस्टॉरंटांचें व्हड लुकसाण जालें. ग्रामस्थांनी उदक मारून उजो पालोपाक मजत केली. हो उजो शॉर्ट सर्कीटाक लागून लागलो आसलो तरी रेस्टॉरंटां बेकायदेशीरपणान चलताली, हें स्पश्ट जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
