भांगरभूंय | प्रतिनिधी
मडगांव: घोगळांतल्या झुडिओ मॉला सामकारचे इमारतींतल्या वायन शॉपाक उजो लागपाी घडणूक आयतारा घडली. मडगांव उजो पालोवपी दळ रोखडेंच घडणुके सुवातेर पावून तांणी उज्याचेर नियंत्रण हाडलें. ह्या उज्यांत दुकानांतलें फर्निचर, फ्रीज, एसी, वायरिंग वांगडा सोर्याच्या बाटल्यांचें मेळून सुमार धा लाखांचें लुकसाण जाल्ल्याचो अदमास आसा.
घोगळच्या ’शॉप राईट लिकर स्टोअर’ ह्या केनेडी सुझा (राय) हांच्या वायन शॉपाक उजो लागलो. आयतारा सुमार सवाय धांक उजो लागपाची म्हायती उजो पालोवपी दळाक मेळ्ळी. फकत १० मिनटांनी उजो पालोवपी दळाचो बंब घडणुके सुवातेर पावलो. हें वायन शॉप लोक रावपी इमारतीच्या तळाक आसा. उज्या धग पयले माळये मेरेन पाविल्लो. उजो पालोवपी दळान रोखडेंच उदक मारून तो पालोवपाचो यत्न केलो. वर भरान उज्याचेर नियंत्रण मेळयलें. उजो पालोवपाक दुसर्याच बंबाक हाडपा खातीर संपर्क केल्लो. ह्या उज्यांत फ्रीज, फर्निचर, पीओपी आनी जेवणाच्या सामाना वांगडा सोर्याचो सांठो लासून गेलो.
’शॉप राईट लिकर स्टोअर’क लागिल्ल्या उज्यांची झळ शेजारच्या ’मुलर ज्वेलर्स’ ह्या दुकानाकूय बसली. उज्याक लागून सुवर्णालंकाराच्या दुकानांतले दोन एसी युनीट लासले. तशेंच दुकानाच्या बॅनराचेंय लुकसाण जालें. हे इमारतीच्या पयले माळये मेरेन उज्याचो धग लागलो. धुंवराचे नागरिकांक बरेच त्रासूय सोंसचे पडले. तशेंच जनेलाचीं कुपा लासल्यांत.
मजगतीं, मडगांवच्या न्यू मार्केट वाठारांतल्या दोन दुकानांक शेनवारा उजो लागिल्लो. जाल्यार आयतारा सकाळीं घोगोळ वाठारांत ही घडणूक घडली. हाका लागून ल्हान सुवातेवेल्या आस्थापनांच्या अग्निसुरक्षेचो प्रस्न मुखार आयला. पालिका प्रशासनान सगल्या आस्थापनांक गरजेच्या परवान्यां सयत उज्याचे सुरक्षिततायेच्या उपाय येवजण्यांची सक्ती करपाची गरज आतां निर्माण जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
