भांगरभूंय | प्रतिनिधी
कुठ्ठाळे: वोळांत, कुठ्ठाळे हांगा शेनवारा सकाळीं एके ३४ वर्सां पिरायेचे बायलेचेर सुर्यान हल्लो जाल्ल्याची घडणूक घडली. हातूंत ती बायल गंभीर जखमी जाली. तिका वाटावपाचो यत्न करतना तिचो बापूयय जखमी जालो.
वोळांत हांगच्या ६६ वर्सां पिरायेच्या गोकुलदास शिरोडकार हांणी दिल्ले पुलीस कागाळी प्रमाण, ही घडणूक शेनवारा सकाळीं सुमार ९.४५ वरांचेर घडली. कागाळदाराची लग्न जाल्ली धूव शीतल पालेकार (३४) ही फुलां काडपा खातीर घरा भायर गेल्ली तेन्ना दुबावीत तांचो पुतणयो सुशांत नरशिव शिरोडकार (४७) तिका मेळ्ळो. शितल हिका पळोवन सुशांत हांणी ‘तूं कुळारा कित्याक येता?’ असो प्रस्न करीत गाळयो मारपाक सुरवात केली. वाद वाडले उपरांत दुबावितान तिचे तकलेर आनी माने कडेन सुर्यान हल्लो करून तिका गंभीर जखमी केली. शितल हांणी बोवाळ केलो तेन्ना तिचो बापूय तिचे मजती खातीर धांवत आयलो. हे घडणुकेंत तिच्या बापायकूय मार लागलो.
दोगांय जखमींक वैजकी उपाचारा हॉस्पिटलांत व्हेल्यांत. ह्या प्रकरणांत वेर्णा पुलिसांनी दुबाविता आड खुन्याचो यत्न केल्ल्याचो गुन्यांव नोंद केला.
हे विशीं फुडलो तपास पुलीस निरीक्षक महेश भोमकार हे पुली निरीक्षक आनंद शिरोडकार हांचे देखरेखी खाला तशेंच मुरगांवचे उपविभागीय पुलीस अधिकारी गुरुदास कदम हांच्या मार्गदर्शना खाला करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
