भांगरभूंय | प्रतिनिधी
पणजी : फोंडें पोटवेंचणुकेत पोस्टल मतदाना खातीर नोंदणी केल्ल्या १७६ मतदारां मदल्या १७१ जाणांनी मतदानाचो हक्क पुराय केला. ५ जाणांनी मतदान करुंक ना. आतां नेमा प्रमाण हांकां मतदान करुंक मेळचें ना, अशी म्हायती वेचणूक अधिकार्यान दिली.
आदले मुख्यमंत्री सर्गेस्त रवी नायक हांच्या मरणाक लागून फोंडें मतदारसंघा खातीर ९ एप्रिलाक मतदान जातलें. कॉंग्रेस, भाजप तशेंच आपाकडल्यान पोटवेंचणुके खातीर नेटान प्रचार सूरू आसा.
दिव्यांग, जाण्टे तशेंच वेंचणूक ड्युटेर आशिल्ले पुलीस तशेंच हेर सरकारी कर्मचार्यां खातीर टपाल पद्दतीन (पोस्टल बॅलट) मतदान करपाची वेवस्था आसता. हे खातीर अर्ज भरून नोंदणी करप गरजेचें आसता. फोंडें पोटवेंचणुके खातीर नोंदणी केल्ल्या १७६ मतदारां मदल्या १७१ जाणांनी मतदान केलां.
८५ वर्सा परस चड पिरायेच्या जाण्टे आशिल्ल्या ११५ जाणांनी नोंदणी केल्ली. हाचे मदल्या ११२ जाणांनी मतदान केलां. दिव्यांग फांट्यांत नोंदणी केल्ल्या २९ मतदारां मदल्या २८ मतदारांनी मतदान केलें. वेंचणूक ड्युटेक लागून ९ एप्रिलाक मतदान करप शक्य नाशिल्ल्या ३२ सरकारी कर्मचारी/ पुलीसानी टपाल मतदाना खातीर नोंदणी केल्ली. ३२ मदल्या ३१ जाणांनी मतदान केलां. टपाल मतदानांतलीं मतां सध्या फोंड्यां स्ट्रॉंग रुमांत दवरल्यां. मतदान जाले उपरांत मतदान यंत्रां सयत तीं मडगांव जावपी मतमेजणी केंद्राचेर व्हरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
