आयज पास्कां. ते निमतान विशेश….
भांगरभूंय | प्रतिनिधी
जेजू क्रिस्ताचें पुनरुत्थान: आमकां एक नवो भरवंसो
खुरसाचें मरण सोंसून जेजू तिसऱ्या दिसा मर्णातलो पुनरुत्थान जालो, ताका आमी “पास्कां” अशें म्हणटात. इंग्लीश भाशेंत Easter. पुराय संवसारभर आमची क्रिस्ती पवित्र सभा हो समरंभ मनयतात. ह्या दिसाची खुशालकाय वेगळेच तरेची, कारण जेजून पुराय मनीसकुळाक सुटका फावो केली. समेस्तांची पातकां आपल्या पवित्र रगतान धुंवन काडलीं.
पास्कांचे परबेक दोन बाजू आसात. पयली जेजू आपलो शीम-मेर नाशिल्लो मोग, कृपा आनी दया मनीसकुळाक दाखोवन दिता. दुसरी म्हणल्यार, जेजू आमकां एक भरवंसो दिता तो म्हणल्यार आमी बरें जिवीत जियेवन पातकांचेर जैत व्हरूंक.
ह्या दिसा आमकां दोन मुखेल देखावे आमच्या दोळ्यां मुखार दिसून येतात.
पयलो, जेजूची समाधी आनी तिचेर आशिल्लो फातर. आनी दुसरो, पास्कांची वात. हे दोनूय देखावे अर्थपूर्ण तशेंच देखीवंत, आनी ते दर एका मनशाच्या जिवीतांत लागू जातात.
जेजू खुरसार मरणाक तयार जालो त्या दिसा सावन खुरसार मरण येयसर ताका जायते कश्ट- वळवळे सोंसचे पडले. तो मेलो आनी निमाणी ताची कूड समाधी पुर्तीच सोपूंक ना, पूण समाधीचो फातर कुशीन काडून पुनरुत्थान जावन तो सर्गार प्रवेश करता.
आमच्या दर एकल्याच्या जिवीतांत कसले ना कसले तरेचे कश्ट-आडखळी आसतात आनी तांचो शेवट तोच उरना, पूण तो बदलता. जिवीतांतल्या कश्टांक, तुफानांक फुडो करीत जाल्यार एक दीस जिवीत सुखाचो सागर जावन बदलूं येता. जो कोण देवाचेर विश्वास दवरून आपलें वायट जिवीत सेडून एक बरें जिवीत जियेवंक सुरवात करता ताका तें देणगें फावो जाता.
दुसरे सुवातेर वात हें प्रतीक – “उजवाडाचें”. मिसाचे सुरवातेक पाद्री ही वात पेटोवन असो उदगारता, “हो क्रिस्ताचो उजवाड”
उजवाड हो काळोखी जिवातांत एक नवो भरवंसो. दर मनशाचें जिवीत ह्या काळखी सावळेन लिपिल्लें आसा, दुसऱ्या उतरांनी म्हणचें जाल्यार निराशीपणान बुडिल्लें आसा. अश्या वेळार हे वाती वरी आमी दुसऱ्या खातीर जायतीं बरेपणां करूं येतात. एकटेपणान जगतात तांकां भेट दिवन, तांच्या गरजांनी आमच्यान तांचो सांगात जावं येता. दुयेंत जाणटी हातरूरणार कश्टवतात तांच्या घरांनी भेट दिवन तांका दुडवांचो वा तांची वखदां हाडूंक मजत करूं येता. गरीब-दुबळ्याक कपडे, शिक्षणाक मजत, भुकेन धडपडटल्यांक जेवण दिवन तांच्या पोटाची भूक मारूं येता. आयज आमच्या संवसारांत अनीत वाडिल्ली आसा ती आमी पळेतात, असल्या वेळार काळजीदारपणान अनितीक फुडो करून सता खातीर झुजून, तांचे हक्क मेळोवन दिवंक भारी वावरूंक जाय.
एक वात जशी काळखी कूड उजवाडान रंगयता तशेंच आमी मोगान आनी आमच्या दयाळू कर्ण्यां वरवीं आयजूच न्हय पूण सदांच असल्या निराश जाल्ल्या जिवीतांक उजवाडाची कीट जावंक वावरूंक जाय.
सगळ्यांक पास्कांची परबीं…
सेबी फेर्नींडीस
9890680527
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
