पास्कांचें आव्हान स्विकारुंया

भांगरभूंय | प्रतिनिधी

खुरीस म्हणल्यार लजेची खुणा अशें लोक मानताले. पूण जेजूक खुरसार खिळायले उपरांत ह्या खुरसाचें म्हत्व वाडलें. खुरीस म्हणल्यार त्यागाची खुणा जाली.

यज पास्कांची परब. पास्कां म्हणल्यार इस्टर वा जेजुच्या पुर्नजल्माचो आयतार. पवित्र शुक्राराक पिलात राजाचो मार्गभ्रश्ट करून जेजू क्रिस्ताक खुरसार मारूंक कायदो आपल्या हातांत घेतिल्ल्या फारीजेव आनी धर्मशास्त्र्यांनी व्हडलें जैत समारंभपाचें कारस्थान रचिल्लें. पिलात राजाकूच न्हय तर जेजून विज्मितां करून बरी केल्ले प्रजेचोय मार्गभ्रश्ट केल्लो. ते खातीर बाराब्बास सारक्या भिरांकूळ पुंडाक बंदखणींतलो सोडोवन जेजूक खुरसार मारपाचें फोर्मोण मागोवन घेवंक तांकां सोंपें जाल्लें. जेजूक खुरसार मारलोच आनी तो मेलोय बी. पूण तीन दिसांनी तो पुनर्जल्म घेवन आपल्या भावार्थ्यांक मेळपाक आयलो. हें एक व्हडलें जैत जेजुकूच न्हय तर ताचेर विस्वास दवरतल्या सगळ्यांक. दोन हजार वयर वर्सां बलांडून गेल्ले घडणुकेचो उगडास करपी क्रिस्तांवांचो एक मुखेल उत्सव म्हणल्यार पास्कां. गोबरा बुधवाराक सुरू जाल्ल्या कॉरेझ्माच्या काळांत 40 दिसांचो उपास आनी दणवण करून पवित्र सातोळ्यांत जेजूच्या त्रासांचो पराकाष्ठा जातकच जेजू मरणाचेर जैत मेळयता, ते समारंभणेचो हो उत्सव. संवसारीक पावंड्यार क्रिस्तांव भावार्थ्यांचो हे केंद्रीय सिद्धांत, इगर्जेंतल्यो प्रार्थना, हेर सेवा, कुटुंबीक जेवण आनी एकामेकाचो मोग करपाची आज्ञा तशेंच भावपणान जियेपाच्या हांवेसान फुडले पन्नास दीस हो काळ चालू उरता. आयच्यान चाळीस दिसांनी, जेजुच्या सर्गार चडण्या उपरांत आनीक धा दिसांनी पवित्र आत्मो संवसारांत ये मेरेन पास्कांच्या काळांत क्रिस्ती लोकांची परंपरा नव्या जिविताचें प्रतिनिधित्व करता.
पास्कांचें मुखेल धर्मीक आनी संस्कृतीक आंग…
खुरीस म्हणल्यार लजेची खुणा अशें लोक मानताले. पूण जेजूक खुरसार खिळायले उपरांत ह्या खुरसाचें म्हत्व वाडलें. खुरीस म्हणल्यार त्यागाची खुणा जाली. देखून पिराचीत काळांत जेजून जे कश्ट सोंसले ताका धर्मीक रितीन म्हत्व आयलें. धर्मीक न्यायशाळेंत जेजुचो कसलोच गुन्यांव सांपडना म्हण न्यायसभा जेजूक सोडून दिवंक सोदताली. पूण शिकोवन दवरिल्ले मनीस जेजुचेर आळ घालतात आनी ताका आपूण गुन्यांवकार थारायतात. जेजू देवनिंदा करता हाचेर ते भर दिताले आनी गुप्त अशी लेगीत खबर पातळायताले की जेजू राजा जालो जाल्यार पिलात राजा आनी ताचे पळटणीन आपलें अस्तित्व पुसून उडोवंचें पडटलें म्हण. तेच खातीर जेजूक नपयत करूंक सगळ्यांचें मन जाल्लें. हांगां भ्रश्ट धर्मीक शिकवण आनी चुकीचे संस्कृतायेचो दिश्टावो जाता. जेजूचें पुनर्जिवंतपण पातकांच्या प्रायश्चितांतल्यान उत्पन्न जाल्लें देवसैमाचें प्रतीक, ताणें मरणाचेर जैत व्हेलें आनी मनीसकुळाक सांसणाच्या जिविताच्या उतराची भासावणी दिली अशें क्रिस्तांव लोक मानतात. पवित्र बिरेस्ताराच्या निमाण्या जेवणा थावन सुरू जाल्ल्या धर्मशास्त्र्यांच्या ह्या विद्रूप खेळांत जेजूक धरप, शुक्राराक खुरसार मारप आनी तिसऱ्या दिसा जेजून जिवंत जावपा सारक्यो घडण्यो घडटात.
पवित्र सातोळ्यांतल्यो मुखेल कार्यावळी…
हे विशीं आमी आदीं चर्चा केल्या. ताळयांच्या आयताराक जेजूचो जेरुझाल्यांत प्रवेश केल्ल्याचो उगडास, पवित्र बिरेस्ताराक निमाण्या जेवणाची, याज्ञिकपण घडयिल्ल्याची आनी जेजून दिल्ल्या प्रितिमोगाचे परबेची समारंभणी, पवित्र शुक्राराक जेजू खुरसार मेल्याचो उगडास आनी पास्कांच्या आयताराक जेजुच्या पुनर्जल्माची परब. शेनवारा रातीं जागृण करून क्रिस्तांव लोक सगळ्यांत व्हडली परब मनयता.
आदल्या आनी नव्या कराराचो संगम…
आमी जाणांत पवित्र पुस्तकाक दोन भाग आसात, एक आदलो करार आनी दुसरो नवो करार. आदल्या करारांत जेजू येवंचे आदल्यो घडणुको जाल्यार नव्या करारांत जेजू आयले उपरांतच्यो घडणुको. हे पास्कांचे परबेन ह्या दोनूय करारांचो संगम जाता. पास्कांची परब आदलेय क्रिस्तांव लोक मनयताले. इझ्रायेलाची प्रजा इजिप्तांत पिडापीड सोंसताली. मोजेसा वरवीं देव तांकां तांबडो दर्या पार करून सुटका फावो करता आनी आपणें भासायिल्ल्या दूद आनी म्हत्वाच्या देशांत हाडटा. हो इझ्रायेल देश आनी तांतूंत वशिल्लें जेरुझालें शार ह्या पास्कांची गवाय आसा. आदले क्रिस्तांव इजिप्तांतल्यान सुटकेचीं पास्कां मनयताले जाल्यार नवे क्रिस्तांव जेजुच्या पुनर्जिवंतपणाचीं पास्कां मनयतात. देखून पास्कांचो गूट जावन आसा संगम आदल्या आनी नव्या करारांचो.
पास्कांचो संदेश…
सोमी जेजून आपल्या पुनर्जिवंतपणा उपरांत केल्ली पयली गजाल म्हणल्यार ताणें सगळ्यांक आपलें दर्शन दिलें, आपूण खरेंच अस्तित्वांत आसा हाची खात्री दिली. हे कृतीन ताणें लोका कडलो आपलो संबंद परतून बांदून हाडलो. जेन्ना तो मनीस कसो संवसारांत आशिल्लो, तेन्ना तो क्रिस्त आशिल्लो. क्रिस्त म्हणल्यार देवान माखिल्लो. लोकांक तो पळोवंक मेळटालो आनी स्पर्श करूंक मेळटालो. देखून हाचो परिणाम असो जालो की जेजू खुरसार मारनूय पुनर्जिवंत जालो ते विशीं लोकाक दुबाव उरलो ना. हाचो आनीक एक परिणाम झळकलो, पुर्नजल्मा उपरांत सोमी जेजून लोकाक दर्शन दिले आनी आदले भशेनूच आपणाक स्पर्श करूंक दिलो, हे गजालीन मनिसकुळाक खंबीरपणीं कृपा युगांत प्रस्थापीत केलें. अशे तरेन सोमी जेजूचे शिकवणेक आनी ताणें केल्ल्या वावराक पाळो दिवन आपले पाटलावदार मुखार वतले हाची ताका खात्री जाली. जेजू मेले उपरांत शिसांकूय भिरांत लागिल्ली, ती लेगीत ताच्या पुर्नजिवंतपणा उपरांत पयस जाली आनी ते आत्मविस्वासान वावरूंक लागले. पास्कां वरवीं तांचो भावार्थ थीर जालो आनी चाळीस दिसांनी जेजू सर्गार वचून पासून ताणीं जेजूच्या वावराक आपली जबाबदारी मानली. पास्कां म्हणल्यार एकप्रकारची सुटका आनी उत्सव, तो भक्तिभावान आनी मोगान हातांत हात दिवन मनोवप होच खरो संदेश आसा.
सोंपयतना…
जेजू मेल्ल्यांतलो कित्याक जिवंत जालो? पवित्र पुस्तकांत जेजू म्हणटा, “गंवाचो कणो जमनीर पडून मरना जाल्यार तो तसोच उरता, पूण मरत जाल्यार जायतें पीक दिता.” आत्मीक फळादीकपण, पुनर्जल्म आनी सासणाच्या जिविता खातीर स्वताक बळी दिवप आनी मरप गरजेचें अशें ही उपमा दाखयता. पास्कांची खोस जेजू क्रिस्ताच्या पुर्नजिवंतपणाचेर केंद्रीत आसा. हें पुर्नजिवंतपण म्हणल्यार मरण, पातक आनी निराशेचेर मेळयिल्लें म्हत्वाचें जैत आसा. पास्कांची परब म्हणल्यार नवी आशा, दैवीक मोग आनी सासणाच्या जिविताच्या वचनाचो उत्सव आसा, जो दुख्खाक सांसणाच्या आनंदांत रुपांतरीत करता. खुशालकायेची पारख दुख्खाचे खोलायेंतल्यान जाता, तसो हो काळ भावार्थी लोकाक भोगसणें, उजवाड आनी आत्मिक नवसरणी आपणावंक आव्हान करता. आमी हें पास्कांचें आव्हान स्विकारूंक तयार आसात? समेस्तांक जेजुच्या पुर्नजिवंतपणाची, अर्थांत पास्कांचीं खुशालभरीत परब आवंडेतात.

विन्सी क्वाद्रूस
9822587498