भांगरभूंय | प्रतिनिधी
पणजीः गोंय राज्यांत सुक्ष्म, लघू आनी मध्यम उद्देग (एमएसमई) क्षेत्रांतल्या ३८ टक्के उद्देगांचे फुडारपण ही बायलां करतात. मात फाटल्या तीन वर्सांत चडशे एमएसएमई उद्देग बंद पडून हाचो फटको बायलां उदेजकांक बसून बायालांचे ५४ टक्के एमएसमई वेवसाय बंद पडल्यात. मजगतीं, एमएसएमई क्षेत्रांत बायलां कर्मचार्यांचे संख्येंत वाड जाल्या.
एमएसमई मंत्रालयान जारी केल्ल्या अहवालांत सांगलां, राज्यांत फाटल्या पांच वर्सांत १.३० लाख एमएसमई कार्यरत आसात आनी तातूंतले ५०,४११ एमएसमईच्यो धनी ह्यो बायलां उद्देजक आसात.
वर्स २०२०-२१त एमएसमई क्षेत्राक बरे दिस येवन २०२३-२४त एमएसमई उद्देगांत व्हडेगाद वाड जाल्ली आनी हातूंत बायलां उद्देजकांचे एमएसमईचो लेगीत आस्पाव आशिल्लो. मात २०२४-२५ सावन एमएसएमई उद्देगांत धपक्याक उणाव जावन बायलां उद्देजकांक व्हडलो फटको बसलो.
२०२३-२०२४त ४६,०७५ एमएसएमई उद्देग कार्यरत आसले आनी तातूंतले २२,००२ एमएसएमई बायलां उद्देजक चलयताली. मात आतां २०२५-२६सात वट्ट एमएसएमईत २२,१६९ मेरेन उणाव जावन बायलां उद्देजक आशिल्ले एमएसएमई ८,६४५ मेरेन पावल्यात.
मजगतीं फाटल्या पांच वर्सांत १.११ लाख बायलां कर्मचारी एमएसएमई क्षेत्रात सक्रीय आसात. फाटले वर्सा बायला कर्मचार्यांचे संख्येंत उणाव जाल्लो. मात ह्या वर्सा हे संख्येंत परत वाड जाल्या. २०२०-२१त १४,९४९ बायलां कर्मचारी, २०२१-२२ त १४,०६० कर्मचारी, २०२२-२३त १९,६६० कर्मचारी, २०२३-२४त २१,६२४ कर्मचारी, २०२४-२५त १८,७०५ कर्मचारी आनी २०२५-२६त २२,३२२ कर्मचार्यांची नोंद जाल्या.
वर्स : वट्ट एमएसएमई बायला एमएसएमई
२०२०-२१ : ५,९९२ १,११४
२०२१-२२ : ८,५५२ १,८६२
२०२२-२३ : १५,३९९ ३,७२३
२०२३-२४ : ४६,०७५ २२,००२
२०२४-२५ : ३१,९६४ १३,०६५
२०२५-२६ : २२,१६९ ८,६४५
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
