भांगरभूंय | प्रतिनिधी
मडगांव : मडगांवच्या न्यू मार्केटांतल्या दोन दुकानांक शेनवारा सकाळच्या सुमार अडेज वरांचेर उजो लागिल्ल्याची घडणूक घडली. उज्यांत हीं दुकानां लासून गोबोर जालीं. हातूंत दुकानदारांचें लाखांनी लुकसाण जालां.
हे विशीं मेळिल्ले म्हायती प्रमाण, शेनवारा सकाळीं सुमार २.३० वरांचेर न्यू मार्केटांतल्या दुकानांतल्यान धुंवर आनी उज्याचो लोट येतना सोपो कर एकठांय करपी सनी हांणी पळयलें. तांणी रोखडेंच हेर दुकानदारांक तशेंच मडगांव उजो पालोवपी दळाक हे विशीं म्हायती दिली.
हे घडणुकेची म्हायती मेळटांच उजो पालोवपी दळाची गाडी रोखडीच घडणुके सुवातेर पावली. जवानांनी बरेच यत्न करून उज्याचेर नियंत्रण मेळयलें. पाख्यावेले पत्रे काडूनय उज्याचेर उदक मारले, हाका लागून उजो आशिकुशीकच्या हेर दुकानां मेरेन पातळपापसून आडावपाक येस आयलें. सध्या परिस्थिती पुरायेन नियंत्रणांत आसा.
ह्या उज्यांत दामोदर बोरकार हांचें ज्यूस शॉप आनी कासिम शेख हांचें टेलरिंग दुकान ह्या दोन दुकानांचें लुकसाण जालें. उज्याचें नेमकें कारण आजूनय स्पश्ट जावंक ना. मा’शॉर्ट सर्किटा’क लागून उजो लागला आसतलो असो दुबाव दुकानदारांनी उक्तायला. ही घडणूक सकाळीं घडिल्ल्यान बाजारांत गर्दी नाशिल्ली, हाका लागून कोणाक कांय जावंक ना. मात ह्या उज्यांत दोनूय दुकानांचें व्हड अर्थीक लुकसाण जालें.
वेपारी संघटणेचे अध्यक्ष गोपाळ नायक हांणी सांगलें, उजो पालोवपी दळान वेळार उजो पालयिल्ल्यान व्हड घडणूक जावपा पसून वाटवली. मार्केटांत ’फायर हायड्रंट’ उबारपाचें काम निमाण्या टप्प्यांत आशिल्ल्यानी ताची जोडणी बेगीनूच दितले. हाका लागून फुडाराक उज्याची घडणूक घडल्यार अदीक सुरक्षीतताय मेळटली, अशेंय तांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
