भांगरभूंय | प्रतिनिधी
कोणाक मंत्रीपद मेळटलें? उमळशीक लागल्या आसतली मतदारांक, गोंयकारांक. म्हापौरपद वर्सा भितर राखून दवरुन अस्तुरेक दियात, मंत्रीपदय तिकाच दिवचें, तिचे बगर जैत कशें मेळटलें?
फोंडें विधानसभा पोटवेंचणुके पासत फुडल्या सप्तकांत मतदान जातलें. हवामान बदललें तरी गोंयकार मतदाना पासून पयस रावना. ज्येश्ठ/ वरिश्ठ मतदारांक मतदान घरा रावन करपाक मेळचें हे खातीर व्हडा राज्यांत आयज मेरेन येत्न जाल्यात. फोंडें पोटवेंचणुकेंत मतदारां पासत मतदान केंद्रां ज्येश्ठां खातीर लागीं हाडपाची वेवस्था जाल्या. फोंडें तालुको सत्तेक लागीं आसा. तालुक्याची, मतदारसंघांतली उदरगत पळोवन मतदार मतदान करतले, असो विश्वास आसा.
फोंडें पोटवेंचणूक गोंयांक, गोंयकारांक नवी दिका दीत आमदारांक मतदारां मेरेन व्हरता अशें दिसपाक लागलां. आमदार मतदारां मेरेन जितले पावतात तितले मतदार तांकांय लागीं येतले. मतदारांक आपल्या म्हऱ्यांत आमदार, मंत्री, नगरसेवक, नगराध्यक्ष आयिल्ले जाय. पणजे म्हापालिका वेंचणुकेन तें दाखोवन दिलां.
फोंडें विधानसभा पोटवेंचणुकेची तारीख अर्थसंकल्पी अधिवेशन चालू आसतना आयली. उपरांत विधानसभेचें अधिवेशन थांबलें. तें थांबोवप समा आसा व्हय? कायदे बदलतात? ताची जाप फुडारांत मेळटली तेन्ना गोंय विधानसभा वेंचणूकय जाल्ली आसतली.
सरकार विधानसभा वेंचणुकेचे तयारेक लागलां. ज्येश्ठ नागरी सेवा अधिकाऱ्यांच्यो बदल्यो जाल्यात. फोंडें पोटवेंचणुकेचे उपरांत आडावन उरिल्लीं प्रमोशनां जातलीं अशी आस्त अधिकाऱ्यांक आसा. प्रमोशनां फकत मंत्री आडायनात हें आतां सरकारी कर्मचाऱ्यांक, लोकांक कळ्ळां. खात्यांच्या मुखेल्यांनी खात्यांतले समितीची बसका वगतार घेतल्यार काम सोपें जाता. सेवावाडीचेर आशिल्ले अधिकारीय प्रमोशनां आडावन दवरतात तें तांचे अधिकार उणे आशिल्ल्यान. मुख्यमंत्र्यांनी बारीकसाण घेतल्यार तांकां खात्यांतलीं आडमेळीं कळटलीं.
पंचायत पावंड्यार पंचांच्यो वेंचणुको वर्सभर जातात, काल वेंचून आयिल्लो पंच फाल्यां वांगडीपद सोडटा. पंचायत कायदो व्हडा प्रमाणात सुदारप गरजेचो आसा. पंचायतींचो कार्यकाळ, पंचायत वाठार, पंचायत वाठारांतलीं उदरगतीचीं कामां, पंच वांगड्यांची पिराय, शिक्षण ह्या विशयांचो अभ्यास करुन कायदो सुदारचो. पंचायतींतले संगीत खुर्चेक थिराय दिवपा पासत कायदो सुदारप समा जातलें.
राज्यांतल्या व्हडा नगरपालिकांच्या वेंचणुकांची तयारी सुरु जाल्या. एक म्हापालिका आनी हेर नगरपालिकांच्यो वेंचणुको एकठांय घेवपा पासत फुडारांत विचार जावचो. विधानसभा वेंचणूक लागीं येता तेन्ना एका मतदारसंघांतली विधानसभेची पोटवेंचणूक घेवप/ ना घेवपाचेर भारतीय वेंचणूक आयोग फुडारा पासत नवी नेमावळ करतलें व्हय?
वेंचणुकां उपरांत वेंचणुको जातात तेन्ना एक राश्ट्र एक वेंचणूक कायदो बेगीन चालीक लागचो अशें मतदारांक दिसल्यार अजाप न्हय. वेंचणुकां पासत भारतीय लोकशाय तिगून उल्ल्या. फोंडें वेंचणुकेंत ती निमण्या चार दिसांनी जागी जातली.
फोंडें पोटवेंचणुकेंत खोस, तिडक उक्तावपाची संद मतदारांक आसा. मतदारांनी व्हडा संख्येन भायर सरुन मतदान केल्यार तें सरकारा आड अशें एका तेंपार मानताले. जिणेशैली, समाजवेवस्था बदलता तेन्ना मतदान चड, उणे जाल्यारय तें सत्ते वाटेन जालां अशें सांगपी मेळटले. पणजी म्हापालिका वेंचणुकेंत कागदाची मतपत्रिका आशिल्ली. ती वेंचणूक सत्तेंत आशिल्ल्या सरकाराक जैता वटेन घेवन गेली. कित्याक? मतदारांच्या वळखीचीं मुखामळां वेंचणुकेंत आशिल्लीं. मतदारांच्या दारांत पावल दवरनासतना मतदारां मेरेन तांकां कशें पावप ताचो अणभव आशिल्लो. सरकारी येवजणींचो, उदरगतीचो लाव घेवपी मतदार सरकाराक मत मारतले, ना जाल्यार कोणाक?
मतदान शंभर टक्के जावचें, भुरग्याक मेळपी मार्कां प्रमाण ही वेंचणूक आयोगाची इत्सा आसता. ते खातीर जागोवपी आसतात मानधन घेवपी, न घेवपीय. प्रशासनातले अधिकारी ते पासत वावुरपाक लागल्यार मतदान 100 टक्के कित्याक जावचें ना?
वेंचणूक विधानसभा, पंचायतींची एकठांय एकेच तारखेर गोंयांत जाल्यात ताच्यो देखी मेळटल्यो. पंचायतीं, म्हापालिका, नगरपालिका, विधानसभा वेंचणुको एकाच वगतार घेवप शक्य जावचेंना पूण थळाव्या स्वराज यंत्रणांच्यो एकेच तारखेर जातल्यो हाचो विचार राज्य वेंचणूक आयोगान करपाक जाय.
“इनफ इज इनफ” चळवळ उबारपाक मुखार सरिल्ले आदले न्यायमूर्ती फेर्दिनबाब रिबेलो हांणी सरकाराक वेंचणुकां पासत मार्गदर्शन करपाक जाय. कित्याक ते इनफ म्हण्टात? आयज मेरेन जालें तें जालें, फुडार तरी आमच्या भुरग्यां पासत दवरुया, तांकां खेळपाक सुवाती जाय, फुटबाॅल खेळपाक शेतां उरचीं अशें तांकां दिसतलें. फेर्दिनबाब गोंयचे दुस्मान न्हय, ते भूंयपूतच न्हय तर आदले आमदारय. गोंय बदलता, मुखेल करुन साश्ट आनी लागसल्ले तालुके आपली अस्मिताय शेणोवंक लागल्यात अशें तांकां काळजाथावन दिसता.
फोंडें तालुको, फोंडें मतदारसंघ हो गोंयचो मध्यबिंदू. त्या तालुक्यान, मतदारसंघान अस्मिताय तिगोवन दवल्ल्या साठ सत्तर टक्क्यां वयर. अंत्रुज म्हालांतल्या देवळांनी कोयर वेवस्थापन जाता, नितळसाणींत गांव वांटेकार जातात तेन्ना शार फाटीं कशें उरतलें?
फोंडें मतदारसंघ, शारा पासतच न्हय तालुक्यांत कोयर वेवस्थापन येवजण प्रकल्प जातलो हे खातीर सरकारान वावुरचें. आयआयटी फोंड्यां जातली हें उतर मुख्यमंत्र्यांनी दिलां. तांकां आदले मुख्यमंत्री रवीबाब नायक हांणी शिक्षणीक मळार केल्ल्या वावराची म्हायती आसा. रवीबाबाचे इश्ट वीजमंत्री सुदिनबाब ढवळीकार, आमदार गोविंद गावडे आयआयटी खातीर सरकारी भूंय दाखयतले. रेल्वे फोंड्यांत नासली तरी करमळे रेल्वेस्टेशन फोंड्यांक लागीं आसा. आयआयटी गोंयचें मुळावण तालुक्यांत आसा. एनआयटी कुंकळ्ळे गेली त्यो बिल्डिंगो आयआयटीक पयलीं मेळच्यो. आयआयटी फोंडे आनी गोंय अभियांत्रिकी म्हाविद्यालय हांचे भितर शिक्षणीक करार जाल्यार अभियांत्रिकीच्या शिक्षणाचो पावंडो वाडटलो. पोटवेंचणुके वेळार मुख्यमंत्र्यांनी दिल्ल्या उतराक म्हत्व आसा. अभियांत्रिकी शिक्षणाचें नवें शिक्षणीक वर्स सुरु जातना विद्यार्थ्यांकय खोस दिवपी निर्णय जावचे. प्रशासनाक मात्शें धांवडायल्यार आयआयटी गोंयच्या मुखेल बिल्डिंगेची बुन्याद 15 आॅगस्टाक घालप शक्य आसा.
गल्फांतले गोंयकार परत येतात तेन्ना तातूंत गिन्यानी, अणभवी सोदल्यार गोंयांत उत्कृश्ठताय येतली. गल्फांतले गिरेस्तकायेंतल्यान गोंयकारांनी घरां बांदलीं, घेतलीं. हे भांगरभूंयेंत बांदिल्लीं घरां झुजा तेंपार तांकां उपेगी, तांकांय बळगें गरजेचें. गल्फांतल्या गोंयकारांच्या भुरग्यां पासत प्राथमिक ते उच्च माध्यमिक, उंचेल्या शिक्षणाच्या पावंड्यार खासा प्रवेशाची तजवीज जावची. पोटवेंचणुके तेंपार झुजाच्या वाठारांतल्यान घरा येवपी गोंयकारां पासत प्रशासन धांवपाक लागलां. विधानसभा वेंचणुकेचे तयारेंत आसतना गल्फांतल्या गोंयकारां पासत धांवपी प्रशासन उपेगाचें.
कोणाक मंत्रीपद मेळटलें? उमळशीक लागल्या आसतली मतदारांक, गोंयकारांक. म्हापौरपद वर्सा भितर राखून दवरुन अस्तुरेक दियात, मंत्रीपदय तिकाच दिवचें, तिचे बगर जैत कशें मेळटलें?
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
