उणें चिकन वाडलें म्हूण खून

भांगरभूंय | प्रतिनिधी

दुबावीत सावंगखोबा सिंगाक अटक

भांगरभूंय । प्रतिनिधी

म्हापशें : बोडगिणी कान कापिल्ले कुडीच्या खुनाचो तपास करपाक म्हापशें पुलिसांक येस आयलां. पार्टे वेळार ताटांत चिकन उणें वाडिल्ल्याच्या वादा वयल्यान हो खून जाल्लो. ह्या प्रकरणांत पुलिसांनी सावंगखोबा चाओबा सिंग (43. रा. बोडगिणी आनी मूळ बिन्नाकंडी आसाम) ह्या दुबाविताक पांच दिसा भितर पुलिसांनी धरलो.

दुबावीत आनी मरण आयिल्लो मनीस हे बेघर आसात आनी ते हमाली आसा. 27 मार्च 2025 ह्या दिसा नव्या कदंब बसस्टॅण्डाचे फाटले वटेन बोडगिणी- मरड वटेन उक्ते सुवातेर मरण आयिल्ल्याचेर जिवघेणो हल्लो जाल्लो. थंयच ते तिगूय पार्टी करताले. रस्त्याचेर रावपी तिगां इश्टांनी पार्टीचें आयोजन केल्लें. शेतजमनीर बसून जेवतना दुबावीत सावंगखोबा सिंग हाच्या ताटांत चिकन उणें आयलें. आपल्याक उणें चिकन वाडिल्ल्याच्या कारणा वयल्यान ताणें आपल्या इश्टा वांगडा वाद घातलो. तातूंत दोगांनी एकामेकाक गाळी संवल्यो. ताचें रुपांतर उपरांत मारामारींत जालें. दुबावितान रागाच्या भरांत बियरीची बाटली फोडली आनी इश्टाचेर हल्लो केलो. कान आनी तोंडाचेर ताणें नेटान वार केले. ह्या हल्ल्यांत इश्टाचो काम मुळांतल्यान कातारलो.

इश्टाक थंयच रगताच्या कोंडांत सोडून दुबावीत आनी ताचो तिसरो इश्ट थंयच्यान पळून गेले. गंभीर अवस्थेंत जखमी इश्ट मजती खातीर कांय अंतर गेलो आनी थंयच पडलो. चड रगत व्हाविल्ल्यान ताका मरण आयलें.

आपल्या इश्टाचेर खुनी हल्लो केले उपरांत दुबावीत म्हापश्यांतूच लिपून रावलो. म्हापशें पुलिसांनी कुशळटाय दाखोवन दुबिवातीचो माग काडलो आनी ताका धरपाची येवजण आंखली. मरण आयिल्ल्या मनशाची अजून वळख पटूंक ना. ताची वळख पटोवपाचे पुलीस यत्न करतात. फुडलो तपास पुलीस निरिक्षक नवीन देसाय करता. मजगतीं, ही खुनाची घडणूक दुसऱ्या दिसा 28 मार्चाक सकाळीं 8 वरांच्या सुमाराक उजवाडाक आयिल्ली. कुडीच्या पोस्टमार्टम अहवालाच्या आदारान पुलिसांनी 30 मार्चाक ह्या प्रकरणांत अज्ञाता आड खुनाचो गुन्यांव नोंद करून तपासचक्रां गतीन घुंवडायिल्ली. शुकारा 3 एप्रीलाक पुलिसांनी गुप्तहेरांचे मजतीन दुबाविताचो माग काडलो आनी ताका अटक केली. पुलिसांक पळोवन दुबावीत धांवलो, पूण अर्दो किलोमिटर अंतर मेरेन फाटलाव करून पुलिसांनी ताका धरलो.