भांगरभूंय | प्रतिनिधी
न्यूयाॅर्क : चार अंतराळवीरांक घेवन गेल्लें आर्टेमिस II मिशन धर्तरेचे कक्षे भायर पावलां आनी चंद्राचे दिकेन सध्या वता.
चंद्राचे वटेन वचपा खातीर ‘ट्रांसलुनर इंजेक्शन’ ह्या नांवान वळखतात ते प्रक्रियेंत ओरियनाचें मुखेल इंजिन ५ मिनटां आनी ५५ सेकंद ‘फायर’ केलें. ही प्रक्रिया सामकी सुटसुटीत जाली, अशें नासाचे डॉ.लोरी ग्लेझ हांणी सांगलें.
कॅनडांतलो अंतराळवीर जेरेमी हॅन्सन हाणें ओरियन कॅप्सूलांतल्यान सांगलें, आमी चंद्राचे वटेन प्रवास करतात आनी आमची भलायकी बरी आसा. सध्या आर्टेमिस II ह्या मार्गाचेर आसा, जंय यान चंद्राचे पयसुल्ले वटेन भोंवून धर्तरेचेर परत येतलें. १९७२ उपरांत मनशान धर्तरेचे कक्षे भायर वचपाची ही पयलीच खेप.
ओरायनांतल्यान आयिल्ल्या लायव्ह प्रक्षेपणांत अंतराळवीरान सांगलें, अंतराळांत आमी पयस वता तशी धर्तरी ल्हव ल्हव ल्हान जातना आमकां दिसता.
चंद्रा लागसार वचपी पयलो बिगर अमेरिकन अंतराळवीर थारिल्लो हॅन्सन हांणी नासा मिशन कंट्रोलाक सांगलें, ह्या मिशनाचेर खर परिश्रम घेतिल्ल्या लोकांची तांक आमकां जाणवता. मनशान परतून एक फावट आपली तांक सिद्ध केल्या, फुडाराची आस्तच आमकां ह्या चंद्राच्या प्रवासांत व्हरता अशें तांणी सांगलें.
चंद्राचेर वयचे पयलीं ओरायन यान सुमार एक दीस उंच धर्तरेचे कक्षेंत रावलो. ह्या काळांत यानाचें इंजिन, नेव्हिगेशन आनी जिवीत आदार दिवपी प्रणालींची चांचणी जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
