भांगरभूंय | प्रतिनिधी
पणजीः मिराबाग-सांवड्डेंचो प्रस्तावीत बंधारो प्रकल्प निमाणो अधिकृतपणान रद्द जालो. हो प्रकल्प रद्द करपाचो निदर्शकांक आनी थळाव्या लोकांक सरकारा कडल्यान औपचारीक आदेश मेळ्ळा. ४९ दिसांच्या निशेधाक व्हड येस मेळिल्ल्यान निदर्शकांनी आनी गांवकारांनी समाधान उक्तायलां.
निदर्शक, थळावे आनी निशेधाक तेंको दिवपी सगळ्यांनी सरकाराच्या ह्या निर्णयाक येवकार दिला. ह्या पुराय निशेधाक एकवटीतपणान तेंको दिवपी नागरिकांचे तशेंच मुख्यमंत्री डॉ.प्रमोद सावंत हांचेय उपकार मानल्यात.
फाटल्या देड म्हयन्या सावन थळावे लोक मिराबाग हांगाचो प्रस्तावीत बंधारो प्रकल्प रद्द करपा खातीर निशेध करताले. ह्या निशेधांत थळावे, पर्यावरणवादी आनी वेगवेगळ्या समाजीक संघटणांनी सक्रीयपणान वांटो घेतिल्लो. ह्या प्रकल्पाक लागून पावसाच्या दिसांनी हो वाठार बुडपाचो धोको आसा अशें थळाव्यांचे म्हणणें आशिल्लें.
ह्या प्रकल्पाक लागून शेतां, देवळां, घरां बुडून थळाव्या पर्यावरणाचेर आनी शेतांचेर परिणाम जातलो असो भंय थळाव्यांनी उक्तायिल्लो. देखूनच थळाव्या लोकांनी एकठांय येवन ह्या प्रकल्पाक विरोध केल्लो. फाटले देड म्हयने ते वेगवेगळ्या तरांनी निशेध करताले. सरकारान निमाणें भौशीक भावनांचो आदर करून हो प्रकल्प रद्द करपाचो निर्णय घेतला; हो प्रकल्प रद्द करपाचो निशेध करपी लोकांनी हें लोकसत्तेचें जैत अशें म्हणलां.
मजगतीं, लोकांची उदकाची वाडट्या प्रमाणांत मागणी मतींत दवरून, शेतकामा खातीर, पिवपाचें उदक आनी उदक मेळचें म्हूण मिराबाग प्रकल्प स्थापन करपाचो वावर हातांत घेतलो. हो प्रकल्प खास करून गांवगिर्या वाठारांतल्या लोकां खातीर म्हत्वाचो आशिल्लो. प्रकल्पाचें काम सुरू करचे पयलीं थळाव्या लोकांक ‘पावर पॉयंट’ सादरीकरणा वरवीं प्रकल्पा विशीं पुराय म्हायती दिल्ली. तेच बरोबर लोकांनी मांडलेले दुबावूय सोययिल्ले.
मात, आतां ग्रामस्थांनी हो प्रकल्प रद्द करपाची केल्ली मागणी आनी सगल्यांचो भावनांक मान दिवन हो प्रकल्प रद्द करता, अशें सरकारान थळाव्यांक धाडिल्ल्या लेखी आदेशांत म्हणलां. जनतेची वाडपी उदकाची मागणी पुराय करपाक तशेंच गांवगिर्या वाठारांतल्या लोकांच्यो उदकाच्यो पयस करपाक दक्षीण गोंय जिल्ह्यांत वा कुशावती जिल्ह्यांत प्रकल्प उभारतले. लोकांक विस्वासांत घेवन आनी तांचें म्हणणें लक्षांत घेवनूच प्रकल्प उबारपा विशीं निर्णय घेतले अशें ह्या आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
