भांगरभूंय | प्रतिनिधी
नागोठणेः मुंबय-गोंय म्हामार्गाचेर आनीक एक भिरांकूळ अपघात जालो. नागोठणे लागसारच्या सुकळी खिंडींत शुक्रारा सकाळीं खाजगी लक्झरी बस उमथल्ल्यान दोन प्रवाशांक जाग्यारूच मरण आयलें. जाल्यार ३८ जाण जखमी जाल्ले. जखमीं मदल्या सुमार १० जाणांची स्थिती गंभीर आसा.
ही बस मुंबयच्यान गोंयांत येताली
मुंबयच्यान गोंयचे दिकेन वचपी ही बस सुकळी खिंडींतल्यान वतना वोल्ताचेर चालकाचें बसीवेल्यान नियंत्रण सुटिल्ल्यान बस उमथली. अपघाताचो व्हड आवाज जाल्ल्यान ह्या वाठारांतल्या थळाव्यांनी अपघाताचे सुवातेर धांव घेतली.
मजगतीं, तंत्रीक दोशाक लागून न्हय जाल्यार चालकाचे बेपर्वायेक लागून हो अपघात जालो असो गंभीर आरोप प्रवाशांनी केला. प्रवाशांनी दिल्ले म्हायती प्रमाण प्रवास सुरू जाले उपरांतच्यान चालक वेगान आनी धोक्याच्या पद्दतीन गाडी चलयतालो. खुबश्या जाणांनी सेगीत शिटकावणी दिली तरी ड्रायव्हरान ताचे कडेन आडनदर केली. धक्को दिवपी गजाल म्हळ्यार कांय प्रवाशांनी प्रवासांत ऑनलायन पोर्टल रेडबसाचेर ड्रायव्हर बेजापसालदारकेन बस चलोवपाची कागाळ केल्ली. पूण तांची दखल घेवचे पयलींच हो अपघात जालो.
अपघाता उपरांत नागोठणे पुलीस आनी थळाव्यांनी जखमीक बसींतल्यान भायर काडून उपचारा खातीर लागसारच्या हॉस्पिटलांत व्हेले. गंभीर जखमी आशिल्ल्या ९ ते १० प्रवाशांक फुडल्या उपचारा खातीर कळंबोलीच्या एमजीएम हॉस्पिटलांत हालयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
