भांगरभूंय | प्रतिनिधी
पणजी : बनावट कागदपत्रां आनी पासपोर्ट वापरून गोंयांत, भारतांत रावप्यां आड गोंयच्या गुन्यांव फांट्यान व्हड कारवाय करून एका विदेशी नागरिकाक अटक केली. ह्या प्रकरणांत रायबंदरच्या क्रायम ब्रांच पुलीस स्टेशनांत कागाळ दाखल केले उपरांत कारवाय केली.
कागाळदार पुलीस निरीक्षक महेश गडेकार हांच्या कागाळी प्रमाण, दुबावीत बुडा ओझोलिन्स (५२, मूळ लाटविया) हांणी आदीं हरमल, पेडणेंच्या माढळावाडो वाठारांतल्या ओशॅनीक व्हिला हांगा रावन गुन्यांव केलो. दुबावितान बनावट कागदपत्रां सादर करून अधिकार्यांक फटयलो आनी विंगड विंगड नांवांनी खुबशे पासपोर्ट मेळयले.
दुबावितान आपली खरी वळख लिपोवन वेगवेगळ्या नांवांनी प्रवास केलो. तशेंच गोंय, भारतांत तो रावलो. हाका लागून भारतीय अधिकार्यांची दिकाभूल जाल्ल्यान, कसलेंच वैध कारण नासतना फटींपणां केल्ल्याचें तपासा वेळा समजलें.
ह्या प्रकरणांत मांद्रें पुलीस स्टेशनांत गुन्यांव नोंद केलो.भारतीय न्याय संहिता २०२३ च्या कलम ३३६(२), ३३६(३), ३४०(२), ३१८ ३१८(४) तशेंच इमिग्रेशन आनी फॉरेनर्स ऍक्ट २०२५ च्या कलम २२ खाला कारवाय केली. ह्या दुबाविताक अटक करून फुडलो तपास पुलीस उपनिरीक्षक अभिशेक चोडणकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
