भांगरभूंय | प्रतिनिधी
पणजी : राज्य सरकारान सुरू केल्ल्या चेक्ड बाय दोतोर हे मोहिमेक राज्यभरांतल्यान बरो प्रतिसाद मेळ्ळो. उपक्रमां खाला ८ ते ३१ मार्च मजगतीं ३७ हजार २९५ बायलांची तपासणी केली. हातूंत बायलांक ११ विवीध तरेच्या दुयेंसां खातीर तपासणी केली. जाल्यार कांय बायलांक वखदां, लस दिली. राज्य सरकारान संवसारीक बायलां दिसाच्या निमतान ८ मार्चाक ही मोहीम सुरू केल्ली. हातूंत ४० वर्सां वयल्या बायलांची फुकट भलायकी तपासणी केली.
मेळिल्ले म्हायती प्रमाण, मोहिमेंत उच्च रक्तदाबा खातीर २७,०२३ बायलांची चाचणी केली. गोडेंमुता खातीर २३,०३६, स्तनांच्या कॅन्सरा खातीर ११,३४७, तोंडांच्या कॅन्सरा खातीर १२,७९३, निमिया खातीर १२,५६३ जाल्यार युरिन इन्फेक्शन खातीर ५,९४३ बायलांची तपासणी केली. तशेंच ३७९ बायालंक टीडी लस जाल्यार १२० बायलां एचपीव्ही लस दिली. २,४०९ बायलांक आनी रक्तांतलें लोह वाडोवपा खातीर गुळयो दिल्यो. जाल्यार २४९४ बायालंक कॅल्शियम गुळयो दिल्यो.
मोहिमे वेळार १३९६ बायलांक सॅनिटरी पॅड दिले. ६,१२९ बायलांक कुटुंब नियोजना खातीर सल्लो दिलो. ३,११० गुरवार बायलां आनी ५६९ प्रसुती उपरांतच्या बायलांची तपासणी केली. ९,६६३ बायलांनी आयुष ओपीडी सेवांचो लाव घेतलो. १,०९१ बायलांची पीएपी खातीर तपासणी केली. जाल्यार १३,२४० बायलांक वेगवेगळ्या विशयांचेर सल्लो दिलो. मोहिमे वेळार जिल्लो हॉस्पिटल, प्राथमीक आनी समाजीक भलायकी केंद्र आनी गोमेको ह्या दोनूय सुवातींनी मोफत तपासणी केली.
मोहिमेंत कांय खाजगी हॉस्पिटलांचोय आसपाव करून घेतिल्लो. ह्या हॉस्पिटलांत सवलतीच्या दरांत तपासण्यो केल्यो. हे खातीर दरेका म्हालांतल्या एका खाजगी हॉस्पिटलाची निवड केल्ली. हे मोहिमे खाला खाजगी हॉस्पिटलांत सामक्या उण्या दरांत ह्यो तपासण्यो केल्यो. बायलां आपले भलायके कडेन आडनदर करतात. तांणी वेळार तपासणी करून फाटाराक जावपी दुयेंसां टाळचे खातीर मोहीम सुरू केल्ली.
२,१४२ बायलां ऍनिमीक
वयल्या काळांत राज्यांतल्या २,१४२ बायलांक ऍनिमिया आशिल्ल्याचें समजलें. १,२४५ बायलांचे सँपल टीबीच्या अत्याधुनीक चाचणी खातीर धाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
