भांगरभूंय | प्रतिनिधी
रेवोड्यां शापोरा न्हंयेच्या पात्रांत नुस्तें मारपा खातीर गेल्ल्या एका गटांतलो थॉमस फर्नांडीस (35, रा. तरमास तळर्ण, पेडणें) हो तरणाटो बुडलो. ह्या बेपत्ता तरणाट्याची रातीं उसरां मेरेन कांयच सुलूस लागूंक नाशिल्ली.
मेळिल्ले म्हायती प्रमाण ही घडणूक बिरेस्तारा दनपारां 3 वरांच्या सुमाराक घडली. रेवोड्यां शापोरा न्हंयचे देगेर 5 जाणांचो गट नुस्तें मारपा खातीर आयिल्लो. नुस्तें मारतना न्हंयेच्या पात्रांत उडयिल्लें जाळें एके सुवातेर आडकून उरलें. तें जाळें काडपा खातीर ह्या गटांतलो बेपत्ता थॉमस फर्नांडीस हाणें न्हंयंत उडी मारली. पूण तो उदका भायर आयलोच ना. तो अचकीत गायब जाल्ल्यान बराबर आशिल्ल्या ताच्या इश्टांनी बोवाळ करून थळाव्यां कडेन मजत मागली. तशेंच पुलीस आनी उजो पालोवपी दळाक आपयलें.
घडणुकेची म्हायती मेळटकच म्हापशें उजो पालोवपी दळाचे अधिकारी गणेश गोवेकार, उपअधिकारी ओंकार कारबोटकार हे जवानां सयत घडणूक थळार दाखल जाले आनी तांणी बोटीच्या आदारान न्हंयेंत सोद मोहीम हातांत घेतली. तशेंच कोलवाळ पुलीस निरिक्षक संजीत कांदोळकार आनी वांगडी पुलिसांनी आनी रहिवाश्यांनी उजो पालोवपी दळाक सोदकामांत मजत केली. पूण सांजवेळा उसरां मेरेन बेपत्ता तरणाट्याचो सोद लागूंक नाशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
