भांगरभूंय | प्रतिनिधी
बार्देसांत दोन दीस मर्यादीत उदका पुरवण
म्हापशें: कोलवाळे तिलारी कानालाच्या क्रॉसिंगा कुशीक एक हजार मिमि व्यासाच्या मुखेल उदका पायपलायनीक दोन कडेन गळटी लागल्या. ह्या उदका पायपलायनीच्या दुरुस्तीचें काम पिवपा उदका पुरवण खात्यान हातांत घेतलां आनी ताका लागून बार्देस म्हालांतल्या चडश्या वाठारांनी शुक्रार 3 एप्रील आनी शेनवार 4 एप्रील 2026 दिसा मर्यादीत उदका पुरवण जातली.
उदका पायपलायनीच्या दुरुस्तीच्या कामाक लागून बार्देस म्हालांतलो पुराय म्हापशें मतदारसंघ, कळंगूट, कांदोळी, गिरी, नेरूल, रेईश मागूश, साळगांव, रेवोडें, नादोडें, थिवी, कामुर्ली, कोलवाळ, मार्ना-शिवोली, सडयें, ओशेल, मयडें, बस्तोडें, भूतकीवाडो आराडी, वाडें, खर्रे ह्या वाठारांनी मर्यादीत उदका पुरवण जातली.
मजगतीं, बिरेस्तारा 2 वेर सकाळीं ह्या पायपलायनीच्या गळटीचो प्रकार उक्तडार आयलो. अस्नोडें उदका शुद्धीकरण प्रकल्पा वरवीं बार्देस म्हालांतल्या वयल्या वाठाराक उदका पुरवण करपी एक हजार मिमि मिटर तांकीचे उदका पायपलायनीक कोलवाळे तिलारी कानालाच्या क्रॉसिंगा कुशीक गळटी लागिल्ल्याचें दिसून आयलें.
उपरांत पियेवपा उदका पुरवण खात्यान रोखडीच कंत्राटदाराच्या आदारान ह्या पायपलायनीचें दुरुस्तीचें काम जेसीबी वरवीं हातांत घेतलें. सांजवेळा हें दुरुस्तीचें काम सुरू आसतनाच कांय अंतराचेर उदका पायपलायनीक अजून गळटी लागिल्ल्याचें खात्याच्या अभियंत्यांक दिसून आयलें.
रातीं उसरां हें दुरुस्तीचें काम लेगीत हातांत घेतलां. ताका लागून खात्यान वयलो हो निर्णय घेतला. दुरुस्तीचें काम पुराय जाले उपरांत रोखडीच उदका पुरवण परतून करतले अशें खात्याच्या अधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
