भांगरभूंय | प्रतिनिधी
सध्या संवसार जायत्या प्रकारच्या आव्हानांतल्यान वता. केन्ना झूज, केन्ना अर्थीक संकश्ट आनी केन्ना समाजीक अस्थिरताय. ह्यो सगल्यो परिस्थिती आमकां जिणेंत स्थिरताय आनी समतोल कसो दवरचो हाचो विचार करपाक लायतात. हालींच्या काळांतल्या आंतरराष्ट्रीय तणावांतल्यान दिसून आयलां की ज्या देशांचे एकामेकां कडेन बरे संबंद आसात ते कठीण काळांत लेगीत हेरांच्या तुळेन बरे स्थितींत आसात. ह्या व्यापक नदरेन वैयक्तीक जिणे कडेन पळयल्यार मागीर इश्टागत ही मनशाच्या जिविताचो एक गरजेचो आनी अमुल्य आदार हें सत्य स्पश्ट जाता.
इश्टागत हो फकत समाजीक संबंद न्हय, तर जिणेक अर्थ, दिका आनी समतोल दिवपी एक शक्त. मनीस हो सभावान समाजीक प्राणी. तो एकटोच रावन पुरायपणान जिणेंतल्या आडमेळींक तोंड दिवंक शकना. कुटुंबा उपरांत चड म्हत्वाचो संबंद खंयचो आसत जाल्यार तो इश्टागत. इश्ट म्हणल्यार आमचें सूख-दुख्ख कसलीच औपचारीकता नासतना वांटून घेवपी. इश्टागत रगता कडेन न्हय तर भावना, विस्वास आनी परस्पर समजुती कडेन संबंदीत आसता आनी हेर सगल्या नात्यां परस ताका खाशेलेंपण हाकाच लागून प्राप्त जाता.
इश्टागतीचें पयलें आंग म्हळ्यार भावनीक आदार. जिणेंत मनशाक निराश वा उदासीनताय जाणवपी जायते प्रसंग येतात. त्या वेळार खरो इश्टच आसता, जो कसलोच सुवार्थ करिनासतना आमचे वांगडा उबो रावता. तो आमकां समजता आनी आमी एकले नात हें आस्वासन दिता. हो भावनीक आदार मनशाक मानसीक नदरेन घटमूट करता आनी कठीण परिस्थितीचेर मात करपाक ताका बळगें दिता. केन्ना केन्ना फक्त कोणा वांगडा आसप हें सगल्यांत व्हडलें बळगें जाता आनी इश्टागतीन मेळपी बळगें हेंच.
खरो इश्ट आमचे भितर लिपिल्ली क्षमता वळखता आनी ती सुदारपाची प्रेरणा दिता. जेन्ना आमकां स्वताचेर दुबाव आसता तेन्ना एक इश्ट आमकां प्रोत्साहन दिता आनी आमचो आत्मविस्वास वाडयता. मनशाचें व्यक्तीमत्व निर्माण करपाक इश्टागतीचो खूब म्हत्वाचो वांटो आसता. तिसरें म्हत्वाचें आंग म्हणल्यार मार्गदर्शन आनी स्वताची सुदारणा. खरो इश्ट आमची तोखणाय करताच पूण आमच्या चुकीं विशीं प्रामाणीकपणान सांगता. तो आमकां चुकीच्या मार्गार वचपाक आडायता आनी योग्य दिशेन वचपाक प्रेरणा दिता. अशे तरेन इश्टागत आमकां बरो मनीस जावपाक आदार करता.
आयच्या काळांत ताण, उदासीनताय, चिंता हे सारकिल्ले प्रस्न खूब प्रमाणांत निर्माण जाल्यात. अशे परिस्थितींत इश्टागत एके तरेचें वखद म्हूण काम करता. इश्टांक लागून ताण उणो जाता आनी जिणे कडेन सकारात्मक नदर तयार जाता, मानसीक भलायकी घटमूट करता. तेभायर समाजीक कुशळटायेच्या विकासांत इश्टागतीचोय म्हत्वाचो वांटो आसता. दुसऱ्याच्या मतांक कसो आदर करचो, मतभेद कशे सोडोवचे आनी सामुहीकपणान कशें काम करचें तें आमी शिकता.
इश्टागतीचो आनीक एक म्हत्वाचो आयाम म्हळ्यार जिणेंतलो आनंद आनी समतोल. फक्त कामांत आनी जापसालदारकेंत बुडून गेल्लें जिवीत जड आनी बेजार करपी जावंक शकता. इश्ट आमच्या जिवितांत सूख आनी उमेद हाडटात. तांचे वांगडचे खीण जिविताक रंगीत आनी याद उरपी करतात. ल्हान ल्हान गजाली, जशे की एकठांय रावप, हांसप वा समस्या सोडोवप सगलेच जिविताक अर्थपूर्ण करतात.
इश्टागत आमकां वांटून घेवपाची आनी सहकार्याची भावनाय शिकयता. खरो इश्ट आपलीं साधनां, वेळ आनी उर्जा निसुवार्थीपणान वांटून घेता. ही भावना आमकां उदार आनी सहानुभुती दिता. जेन्ना आमी दुसऱ्यांक मजत करतात आनी तांकां आदार मेळटा तेन्ना आमचे भितर मनशाचीं मुल्यां विकसीत जातात. हाचे भायर इश्टागतीन जिणेंत स्थिरताय आनी सुरक्षेचीय भावना निर्माण जाता. कोण तरी आमचे वांगडा सदांच उबो आसा हें जाणा जावन मानसीक नदरेन सुरक्षीतताय जाणवता. ही सुरक्षीतताय आमकां जिणेंत जोखीम घेवपाक आनी नव्या संदींक आपणावपाक प्रेरीत करता. खरी इश्टागत काळाच्या परिक्षेचेर उबी रावता. जिणेंत परिस्थिती बदलता, मनीस बदलता, पूण खऱ्या इश्टाचो सांगात कायम उरता. काळा प्रमाण हो संबंद घट आनी खोल जाता. हाकाच लागून भुरगेपणांतल्या इश्टांक आयुश्यभर एक खाशेली सुवात आसता.
पूण, दरेक नातें इश्टागत न्हय हें आमी समजून घेवप लेगीत म्हत्वाचें. खरी इश्टागत विस्वास, प्रामाणीकपण आनी आदर हांचेर आदारिल्ली आसता. सुवार्थ, मत्सर आनी फटवणूक हांचेर आदारिल्ले संबंद चड काळ तिगना. देखून आमी आमचे इश्ट बरे तरेन वेंचून काडप आनी खरें नातें तिगोवन दवरप म्हत्वाचें. आयच्या डिजिटल युगांत इश्टागतीचें स्वरूप बदलत आसा. सोशल मिडिया वरवीं आमी जायत्या जाणां कडेन जोडटात, पूण ह्या संबंदांत खोलाय ना. इश्टागत फक्त आभासी संवादांतल्यान न्हय जाल्यार खऱ्या अणभवांतल्यान आनी भावनीक संबंदांतल्यान तयार जाता.
इश्टागतीचें म्हत्व फक्त वैयक्तीक जिणेंत मर्यादीत उरना, पूण समाज आनी राष्ट्राच्या पांवड्यार तें तितलेंच म्हत्वाचें. मनशाच्या जिवितांत इश्टागत ही सहकार्याचो आनी उदरगतीचो आदार जाता तेचप्रमाण समाजांतली उदरगत फक्त परस्पर सहकार्यान आनी सद्भावने वरवींच शक्य जाता. जेन्ना लोक एकामेकां कडेन इश्टागतीन वागतात तेन्ना समाजांत शांती आनी समृध्दीचें वातावरण निर्माण जाता. इश्टागत आमकां एक बरो मनीस जावपाक आदार करता आनी आमच्या जिविताक पूर्णताय दिता. जिणेंतल्या अडचणींत इश्ट आमचो सगल्यांत व्हडलो आदार, आनी सुखांत ते आमचें सूख जायते पटींनी वाडयतात. जिवीत जर एक प्रवास आसत जाल्यार इश्टागत हो त्या प्रवासांतलो सगल्यांत सोबीत आनी गरजेचो साथिदार. इश्टागती बगर जिवीत अपूर्ण आसता आनी इश्टां वांगडा जिवीत एक सुखी, समतोल आनी अर्थपूर्ण अणभव जाता.
डॉ. चिन्मय मधू घैसास
9823728640
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
