भांगरभूंय | प्रतिनिधी
शिरगांव जात्रा मंगळार 21 एप्रीलाक. जात्रेची याद आतां कायमची एके दुर्घटणे कडेन जोडल्या. पोरूं खेटाखेट जावन स भाविकांक मरण आयिल्लें. अंदूं वायट घडचें न्हय, म्हूण देवस्थान समिती आनी सरकारी यंत्रणेन बरेच उपायूय घेतल्यात. भाविकांनी आनी धोंडांनी शिस्त पाळची, असो उलो देवस्थान समितीन मारला. जात्रेंत जें कितें घडटा, ताचें खत देवी लयराईक, तिच्या देवळाक, जात्रेक लागता, हाचें भान दवरपाक जाय. जात्रेच्या निमाण्या दिसा फक्त धोंडांक आनी तांच्या घरच्यांकूच प्रवेश दिवचो, असो विचार पोरूं व्यक्त जाल्लो. पूण देवी, जात्रा ही सगल्यांची. म्हणटकच अंदूं सगल्यां भाविकांक देवळांत प्रवेश दिवपाचो निर्णय समितीन घेतला, हें बरें जालें.
जात्रे दिसा देवळांत ओटी भरपाक बायलांची गर्दी जाता. देवीची सासाय ही सदांच आसता. म्हणटकच ओटी भरपाक, दर्शन घेवपाक जात्रे दिसूच येवपाक जाय अशें ना. जात्रे पयलींच हो विधी करचो असो उलो समितीन मारला. परंपरे प्रमाण, सगलीं एकाच दीस आयल्यार गर्दी जातली. अंदूं सगले धर्मीक विधी जातले. मात कांय विधीं वेळार वाटेर विशेश सुरक्षा आसतली खंय. भाविकांक हें खटकूं येता. पूण तांणी कारण मतींत घेवन सहकार्य करचें. देवळाच्या वाठारांत धोंडां खातीर आनी भाविकां खातीर वेगळो मार्ग आसतलो. म्हणटकच गर्देचेर नियंत्रण येतलें. होमखण पेटले उपरांत धोंडांक तळ्या कडेन वचपाक एकूच मार्ग आसतलो. त्या वेळार तो भाविकांक बंद दवरतले. अंदूं ड्रोन, सीसीटीव्ही कॅमेरे आसात, म्हणटकच सगल्यो हालचाली नोंद जातल्यो. त्यो पुलिसांक पळोवपाक मेळटल्यो. मुड्डी ते देवळा मेरेनचो रस्तो पूर्ण मेकळो दवरतले. थंय दुकानां लावपाक दिवचे नात. फक्त धोंडा खातीर पिवपाच्या उदकाची वेवस्था करतले. पूण, ते खातीर सरकारान परवानगी दिवंक जाय. खुद्द समितीन पिवपाच्या उदकाची वेवस्था करूं येता वा भोंवते विक्रेते दवरूं येतात.
जात्रा वाठारांतले बार बंद आसतले. तरीय शिरगांवां भितर सरपाच्या सगल्या मार्गांचेर अल्कोमिटर घेवन पुलीस दवरचे. म्हणटकच कोण ‘नशें’त बी जात्रेक आयल्यार सांपडटलो. जात्रेचें पावित्र्य राखपाक जाय. खाज्याचीं दुकानां दुसरे कडेन हालयल्यात खंय. खाजें हो गोंयच्या जात्रांचो आत्मो. खाज्या बगर जात्रेक रुच ना. तें जायच. पूण, गिरायकांक आकर्शीत करपाक कायलींनी खाजें तळून दितात, तें गर्देंत धोक्याचें थारूंक शकता. हेंच भजीं, मिरचीच्या स्टाॅलांचें. कोयते, सुरयो, आदोळी विकपी आयल्यार तांकां पयस बसोवचे. जुगाराचीं दुकानां नाकाच. पुराय जात्रेचें, खास करून होमखणाचें ‘थेट प्रक्षेपण’ सोशल मिडिया आनी टिव्ही चॅनलां वरवीं करूं येता. जांकां जात्रेक येवप शक्य ना, तांची तजवीज जातली. घडये गर्दीय थोडी उणी जायत. थारावीक जाग्यांचेर दोतोर, नर्स, एम्बुलन्स, फर्स्ट एडाचीं केंद्रां आसचीं. अकस्मात कितेंय जाल्यार गाडी व्हरपाक वाटूय जाय. होमखण पेटोवपाचो, तातूंतल्यान अग्नीदिव्य करपाचो थारावीक वेळ आसता. तो वाडयल्यार गर्दी कमी जावंक शकता? वेळाचे स्लाॅटूय दवरूं येतात. व्हीआयपी दर्शन आसता? आसल्यार भाविकांक ताटकळत दवरचें न्हय. वचपा, येवपाची वाट वेगळी आसल्यार चड बरें.
देवा कडेन पावपाक धांवपळीची गरज ना. मन शांत, पावलां संयमी, श्रद्धा आसली काय तो तुमचे कुशिकूच येवन उबो रावता. गर्देंत मुखार धांवचे परस, सगल्यांक सुरक्षी दवरपांतूच व्हडपण आसा. जंय शिस्त, तोच उत्सव सुंदर. नाजाल्यार श्रद्धा आनी भक्ती पसून संकश्टांत
येता. पयलें दर्शन, पयलो मान, आमची देवी, आमची जात्रा हें विसरून जात्रा, देवी सगल्यांचीच ही भावना मनांत दवरल्यार सगलेंच
बरें जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
