भांगरभूंय | प्रतिनिधी
डोनाल्ड ट्रम्प : राष्ट्राक उद्देशून भाशण
खबरां संस्था
वॉशिंगटन डी.सी.: इराणा आड चालीक लायिल्ली मोहीम पुराय येसस्वी जाल्या, अशें अमेरिकेचे राष्ट्राध्यक्ष डोनाल्ड ट्रम्प हांणी जाहीर केलें. तशेंच लश्करी कारवायेचें समर्थन करून अमेरिकन सैन्यान केल्ल्या हल्ल्यांचें तांणी समर्थन केलें. फाटलो म्हयनोभर चालू आशिल्ल्या अमेरिका आनी इराण हांच्या संघर्शाचे फाटभुंयेर डोनाल्ड ट्रम्प हांणी बिरेस्तारा राष्ट्राक उद्देशून भाशण केलें.
ट्रम्प हांणी आपल्या भाशणांत येसाचो दावो केलो. आमच्या सैन्यान खुबूच अचूकपणान आनी धोरणात्मक नियोजनान निर्धारीत केल्लीं सगलीं उद्दिश्टां साध्य केल्यांत. अमेरिकेच्या दुस्मानांनी आमच्या सार्वभौमत्वाक आव्हान दिवपाचो यत्न केल्लो. जाका आमी जश्याक तशी जाप दिल्या, अशें ट्रम्प हांणी सांगलें.
मोहीम अजून पुराय सोंपूंक ना. आमी आमचीं उद्दिश्टां पुराय केल्लीं आसलीं तरी लेगीत शांतताय प्रस्थापीत जाय मेरेन आनी अमेरिकेच्या हिताचें रक्षण सुनिश्चीत जाय नेरेन ही लश्करी कारवाय चालूच उरतली, अशेंय ट्रम्प हांणी सांगलें.
इराणांतली परिस्थिती आतां पुराय बदल्ल्या. संवसारीक वेपारा खातीर म्हत्वाची आशिल्ली स्ट्रेट ऑफ होर्मूझ बेगिनूच सर्वसामान्य येरादारी खातीर उक्ती जातली, अशेंय संकेत ट्रम्प हांणी आपल्या भाशणांत दिले.
भाशण सोंपताच इराणाचे नेटान हल्ले
अमेरिकेक उद्देशून भाशण करतना डोनाल्ड ट्रम्प हांणी इराणाक खर उतरांनी शिटकावणी दिली, पूण ट्रम्प हांचें भाशण सोंपताच इराणान इझ्रायलाचेर नेटान हल्ले केल्ले. हाका लागून झुजाची स्थिती आनीक तापपाचीं चिन्नां आसात, अशें मानतात. इराणान फांतोडेर कतारच्या दर्यादगे वयल्या एका तेल टँकराचेर लेगीत हल्लो केलो, तशेंच कुवेट आंतरराष्ट्रीय विमानतळाचेर हल्लो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
