भांगरभूंय | प्रतिनिधी
पणजी : राज्यसभेचे खासदार सदानंद शेट तानावडे हांणी राज्यसभेंत गोंयां खातीर स्वतंत्र पोस्टल सर्कल स्थापन करपाची मागणी केल्या. सध्या गोंय, महाराष्ट्र पोस्टल सर्कल खाला आशिल्ल्यान; राज्याच्यो प्रशासकीय, भाशीक आनी समाजीक गरजो भागोवंक मेळनात. गोंयच्या तरणाट्यांक नोकरी मेळपाची संद मेळपाचेर तांणी भर दिली.
सभाघराचें लक्ष ओडून घेवन तानावडे हांणी म्हणलें, हो बर्याच काळासावन प्रलंबीत आशिल्लो मुद्दो. स्वतंत्र राज्य आसून लेगीत गोंय अजूनय दुसर्या राज्याच्या टपोस्टल प्रशासना खाला आशिल्ल्यान सेवा दिवपाच्या मळार अडचणी निर्माण जातात असो उल्लेख तांणी केला.
भरती प्रक्रियेविशीं चिंता उक्तायतना तांणी सांगलें, पोस्टल सेवांतल्या भरती सर्कल पांवड्यार जाल्ल्यान व्हड राज्यांतल्या उमेदवारांक अदीक संदी मेळटात. हाका लागून गोंयच्या थळाव्या तरणाट्यांक नोकरेच्यो संदी उण्या प्रमाणांत मेळटात आनी तांच्या प्रतिनिधित्वाचेर मर्यादा येता.
तशेंच भायल्यान नियुक्त जाल्ले कर्मचारी उण्या काळांतूच बदली घेवन आपल्या मूळ राज्यांत परततात. हाका लागून सेगीत पदां रितीं जातात. ह्यो रित्यो सुवात्यो तात्पुरते वेवस्थेवरवीं भरच्यो पडटात. जाचो परिणाम पोस्टल सेवांच्या कार्यक्षमतेचेर, सातत्याचेर आनी विस्वासाचेर जाता, अशें तांणी सांगलें.
गोंयचो भौगोलीक आकार ल्हान आशिल्ल्यान स्वतंत्र पोस्टल सर्कल अदीक कार्यक्षम आनी नागरिक-केंद्रीत थारूं येता, अशेंत तानावडे हांणी अधोरेखीत केलें.
निमाणें गोंयां खातीर स्वतंत्र पोस्टल सर्कलाची बेगोबेग स्थापना करपाची मागणी करीत तांणी सांगलें, ह्या निर्णयाक लागून प्रशासन अदीक सक्षम जातलें, सेवा वितरण सुधारतली आनीथळाव्या तरणाट्यांच्यो रोजगाराच्यो संदी चालीक लागतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
