लयराईचे जात्रेक सगल्यांक प्रवेश उक्तो
भांगरभूंय | प्रतिनिधी
देवळाच्या अध्यक्षान शिस्त पाळपाचो मारलो उलो
दिवचल: अंदूं शिरगांवचे लयराई देवीची होमखण जात्रा २१ एप्रीलाक मनयतले. हे जात्रेक सगल्या भाविकांक देवळांत प्रवेश दितले. ह्या दिसा व्हडली गर्दी अपेक्षीत आसा. हाका लागून सगल्या भाविकांनी आनी धोंडांनी शिस्त पाळून प्रशासनाक सहकार्य करचें, असो उलो देवळाचे अध्यक्ष दीनानाथ गांवकार हांणी मारलो.
जिल्लोधिकार्यांनी जात्रे दिसा गर्देचेर नियंत्रण दवरपा खातीर आनी हो उत्सव बरे भशेन जावपा खातीर कांय मार्गदर्शक तत्वां जारी केल्यांत. हे नेम खरपणान पाळचे अशेंय तांणी सांगलें. तशेंच जिल्लोधिकारी, उपजिल्हाधिकारी, मामलेदार, पुलीस अधिकारी आनी येरादारी विभाग हांणी दिल्ल्यो सुचवण्यो पाळपाचोय उलो मारलो.
जात्रे दिसा धोंड तशेंच सकाळ सावन सगल्या भाविकांक प्रवेश दितले.
सवायशिणींनी जात्रे दिसा गर्दी टाळपाक जात्रे पयलींच देवळांत ओटी भरपाक येवचें, अशेंय म्हणलां.
फाटल्या दिसांनी जात्रेच्या धोंडगणांची बसका जाली. लयराईचे जात्रेक फाटल्या वर्सा घडिल्ले भिरांकूळ घडणुके उपरांत अंदूं जात्रा सुरक्षीत आनी शिस्तीन जावची म्हूण देवस्थान समिती आनी प्रशासनान व्यापक नियोजन केलां.
धर्मीक विधी, सुरक्षा वेवस्था आनी केल्ले हेर बदल
- सवायशिणींनी जात्रे दिसा गर्दी टाळपा खातीर जात्रे पयलींच देवळांत ओटी भरपाक येवचें
- दर वर्सा प्रमाण सगल्यो धर्मीक विधी जातल्यो. मात अंदूं देवळांतल्यान चिरो आनी कळस भायर काडटना, तशेंच होमखण मार्गक्रमणाच्या वेळार विशेश सुरक्षा वेवस्था करतले.
- जात्रेक खर पुलीस बंदोबस्त दवरतले. गर्दी नियंत्रणा खातीर देवळाच्या वाठारांत धोंडां खातीर वेगळो मार्ग आनी भाविकां खातीर वेगळो मार्ग, रांग आसतली.
- होमखण पेटले उपरांत धोंडांक तळ्या कडेन वचपा खातीर एकूच मार्ग वापरपाक मेळटलो. होमखण मार्गक्रमणाच्या वेळार हो मार्ग हेर सगल्या भाविकां खातीर बंद उरतलो.
- देवूळ आनी होमखणाच्या वाठारांत सीसीटीव्ही कॅमेरे बसयतले. सगल्या हालचालींची बारीक नोंद दवरतले.
- देवीची सेवा करतना दरेकल्यान शिस्त आनी जापसालदारी राखप गरजेचें.
- फाटल्या वर्सा जाल्ले खेटाखेटीचे घडणुके उपरांत अंदूं सगल्यांनी जापसालदारकेन वागचें.
- मुड्डी ते देवीच्या देवळा मेरेनचो रस्तो पुरायेन मेकळो दवरतले. ह्या रस्त्यार कसलेच तरेचीं दुकानां लावपाक परवानगी दिवचे नात.
- अग्निदिव्या उपरांत धोंडां खातीर उदक वा कोल्ड्रींक्सांची वेवस्था करपाक होमखणाच्या वयल्या भागांत मर्यादीत दुकानां उबारपाक जिल्लोधिकार्याची परवानगी मेळ्ळ्यारुच तीं घालपाक मंजुरी दितले. जात्रे दिसा सोर्याचीं दुकानां बंद दवरपाचो आदेशूय काडटले.
ही म्हायती देवस्थान समितीचे अध्यक्ष दीनानाथ गांवकार हांणी दिली. तशेंच धोंडांनी आनी भाविकांनी सगले नेम पाळचे असोय उलो तांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
