भांगरभूंय | प्रतिनिधी
वाळपय: खोतोडा ग्रामपंचायत वाठारांतल्या खडकी हांगा श्रीराम देवळा कुशीक बुधवारा रातीं 8 वरांच्या सुमाराक अनील नायक हांच्या घराक अचकीत उजो लागून व्हड प्रमाणांत लुकसाण जालें. ह्या उज्यात घरांतलें पुराय सामान जळून गोबर जाल्ल्यान कुटुंबाक व्हड अर्थीक फटको बसलाे.
मेळिल्ले म्हायती प्रमाण अनील नायक हे पोरण्या घराचे सुवातेर नव्या घराचें बांदकाम करताले. ताका लागून घरांतलें सगलें सामान कुशिकूच आशिल्ल्या दोन कुडींनी सांठोवन दवरिल्लें.
नायक कुटुंब सद्या दुसरी कडेन रावत आशिल्ल्यान बुधवारा सांजवेळा तांणी देवाक दिवो लावन थंय सावन गेल्ले. उपरांत रातीं आठ वरांच्या सुमाराक अचकीत उजो लागिल्ल्याची घडणूक घडली.
उज्याचें प्रमाण व्हड आशिल्ल्यान थळाव्या नागरिकांनी उजो पालोवपाचो यत्न केलो. पूण तांकां येस आयलें ना. परिस्थिती हाता भायर वचत आशिल्ल्याचें पळोवन वाळपय उजो पालोवपी दळाक आपोवचें पडलें.
उजो पालोवपी दळाचे जवान रोखडेच घडणूक थळार दाखल जाले आनी तांणी झुजां पांवड्यार यत्न सुरू केले. उज्याची खरताय लक्षांत घेवन दुसरो बंब मागयलो. दोनूय बंबाच्या आदारान सुमार देड वरां उपरांत उज्याचेर नियंत्रण हाडपाक येस आयलें. पूण तो मेरेन दोनूय कुडीतले कपडे, घरगुती साहित्य आनी हेर सामान पुरायपणान जळून गोबर जाल्लें.
दळाच्या म्हायती प्रमाण उज्यान दोनूय कुडींक चारूय वटांनी रेवाडो घाल्लो ताका लागून व्हड प्रमाणांत लुकसाण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
