भांगरभूंय | प्रतिनिधी
– अायज ट्रम्प करतले म्हत्वाची घोशणा
– सगले हल्ले पांच दिसां खातीर स्थगीत
– इराणा कडल्यान झूज विरामाची मागणी
वॉशिंग्टनः अमेरिकेचे अध्यक्ष डोनाल्ड ट्रम्प हांणी इराण आनी अमेरिका संबंदीत झुजा विशीं व्हड म्हायती दिल्या. मध्य उदेंतांतल्या सध्याच्या संघर्शा संबंदी इराणा कडेन सकारात्मक चर्चा जाल्या अशें तांणी सांगलें, आनी झुज पुरायपणान सोंपपाची शक्यताय उक्तायल्या. ते भायर इराणी वीज प्रकल्प आनी उर्जा मुळाव्या साधनसुविधांचेर जावपी सगले हल्ले पांच दिसां खातीर स्थगीत करपाची घोशणा तांणी केल्या. ट्रम्पाच्या ह्या विधानाक लागून आतां झूज ल्हवू ल्हवू शांतताये कडेन वचपाक लागलां अशें संकेत मेळटात.
ट्रम्प हांणी सोशल मिडियाचेर बरयल्ल्या पोस्टांत म्हणलें, फाटल्या दोन दिसांत अमेरिकेचीं संयुक्त संस्थानां आनी इराण हांचे मदीं खूब बरी आनी सकारात्मक चर्चा जाल्या. हे सांगपाक म्हाका खूब खोस जाता. ह्यो चर्चा मध्य उदेंतांतल्या आमच्या संघर्शाचो पुराय निवाडो करपा कडेन संबंदीत आसात. ही चर्चा खोलायेन, विस्तारीत आनी रचनात्मक चर्चांच्या वातावरणांत, जी सप्तकभर चालू उरतली, हांवें झुज खात्याक इराणी वीज प्रकल्पांचेर आनी उर्जा मुळाव्या साधनसुविधांचेर सगले लश्करी हल्ले स्थगीत करपाचो आदेश दिला. हो निर्णय सध्या चालू आशिल्ल्या बसका आनी चर्चांच्या यशाचेर आदारून आसतलो.
————–
ट्रम्प हांचे घोशणे उपरांत इराणाची प्रतिक्रिया
ट्रम्प हांणी सोशल मिडियाचेर केल्ल्या पोस्टाक लागून परतून एक फावट बोवाळ जाला. इराणाच्या नॅशनल सेक्युरिटी आनी परराश्ट्र धोरण आयोगाचे म्हणयारे इब्राहिम रेझाई हांणी जाप दितना म्हणलें, “झूज चालू आसा आनी दुस्माना खातीर हो आनीक एक हार. ट्रम्प आनी अमेरिकेची परत एक फावट हार जाल्या.” इराणाची ही प्रतिक्रिया ट्रम्पाक प्रोत्साहन दिता. अमेरिके कडेन हे विशीं थेट उलोवणी जावंक ना आनी ट्रम्पाचे दावे पुरायपणान फटीेचे आसात अशें इराणान स्पश्ट केलां. ह्या घडामोडींक लागून अमेरिकेच्या शेअर बाजारांत व्हड उसळी आयल्या आनी इराणाच्या शेजारच्या देशांकय कांय प्रमाणांत थाकाय मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
