भांगरभूंय | प्रतिनिधी
पणजीः देशांत पयलेच फावट डिजिटल पद्धतीन जावपी जनगणना आयच्यान सुरू जाली. गोंयांत गृह जनगणनेचो पयलो टप्पो १ एप्रील ते १५ मे मेरेन जातलो. १ ते १५ एप्रील ह्या काळांत पोर्टलाक भेट दिवन स्वताची नोंदणी करपाक मेळटली. बुधवारा मुख्यमंत्री डॉ. प्रमोद सावंत हांणी मोबायलावेल्यान स्वयं नोंदणी पद्धतीन आपली म्हायती अपलोड केली. गोंय तशेंच पुराय देशाचें ध्येय, धोरणां थारावपा खातीर जनगणना म्हत्वाची आशिल्ल्याचें सगल्या नागरिकांनी सक्रियपणान हे प्रक्रियेंत वाटेकार जावचें असो उलो तांणी मारलो.
मुख्यमंत्र्यांनी सांगलें, जनगणना ही फकत एक सांख्यिकीय प्रक्रिया न्हय. तर ती प्रभावी नियोजन, सर्वसमावेशक शासन आनी दरेक नागरिकांच्यो गरजो वळखून त्यो पुराय करतले हाची खात्री करपी एक बुन्याद. देशांतल्यो तशेंच राज्यांतल्यो मुळाव्यो सुविधा, भलायकी सेवा, शिक्षण, समाजीक कल्याणकारी येवजण्यां खातीर सरकारा कडेन अचूक म्हायती आसप गरजेचें. घटमूट आनी प्रगतीशील गोंय आनी देशा खातीर ही म्हायती म्हत्वाचे निर्णय घेवपाक मजत करता. जनगणने वरवीं सरकाराक ही म्हायती मेळटली.
समाजांत दरेक आवाज गोंय आनी भारताचो फुडार घडयता. गोंयांत आयच्यान स्वयं नोंदणी प्रक्रिया सुरू जाल्या. हे प्रक्रियेंत वाटेकार जावन गोंय राज्य, देशा खातीर एक व्यापक, अचूक म्हायती संच तयार करपाच्या यत्नांत वाटेकार जाल्यात. सगल्या नागरिकांक ह्या म्हत्वाच्या कार्यांत सक्रियपणान वाटेकार जावप गरजेचें. लोकांनी १५ एप्रिल मेरेन उपलब्ध आशिल्ल्या स्वयं नोंदणी सुविधायेचो लाव घेवचो. लोकांची खरी आकांक्षा दाखोवपी धोरणां तयार करपा खातीर जनगणनेंत दरेकल्याचो आसपाव गरजेचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
