भांगरभूंय | प्रतिनिधी
आदिवासी कल्याण मंत्री रमेश तवडकार हांची घोशणा
पणजीः आदीवासी कल्याण खात्याच्या मातृत्व येवजणेक स्कॉच हे संस्थेचो रुप्या पुरस्कार फावो जाला. आदीवासी समाजांतल्या ज्या जोडप्यांक भुरगे जायना तांकां फुकट आयव्हीएफ सुविधा हे येवजणेंतल्यान मेळटा, अशी म्हायती आदीवासी कल्याण मंत्री रमेश तवडकार हांणी दिली.
नवी दिल्ली इंडीया हॅबिटांत सेंटरांत जाल्ल्या खाशेल्या सुवाळ्यांत हो पुरस्कार आदिवासी कल्याण खात्याक भेटयलो. आदिवासी कल्याण खात्याचे संचालक निलेश धायगोडकार आनी गोंय राज्य आदिवासी वित्त आनी उदरगत म्हामंडळाचे वेवस्थापकी संचालक प्रितिदास गांवकार हांणी हो पुरस्कार स्विकारलो.
हे विशीं अदीक म्हायती दितना मंत्री तवडकार हांणी सांगलें, २०१२ ते २०१७ मजगतीं आदीवासी कल्याण मंत्री आशिल्ल्या काळांत तांणी सादारण २२ ते २३ येवजणांची अंमलबजावणी केली. हातूंत मातृत्व येवजणेचो आस्पाव आशिल्लो.
समाजा भितर जे अशिक्षीत लोकांचे भावनेक लागून भुरगे नाशिल्ले जोडप्याक लागून अंधश्रध्दा तयार जावन समाजा भितर मोठी समस्या निर्माण जाताली. देखून समाजाक हे दुख्खा पासत थाकाय दिवपा खातीर मातृत्व आयव्हीएफ येवजण जाहीर केली. हे येवजणे वरवी वैजकी उपचार खातीर पांच लाख रुपयांचो लाव मेळटा आनी अशी येवजण भारत भर खंयसरच ना, अशें तवडकार हांणी सांगलें.
हे येवजणे खाला एम्पेनेल्ड केल्या सात खाजगी होस्पिटलांनी आयव्हीएफ उपचार मेळटा आनी हालींच गोंय वैजकी महाविद्यालयाचो येवजणे भितर आस्पाव केला. आतां मेरेन हे येवजणे खातीर ३५० जोडप्यांनी अर्ज केला. तातूंतल्या ६० बायलांनी आयव्हीएफ पध्दती वरवीं ७२ भुरग्यांक जल्म दिला. हातूंत एक तिळी आनी १० जुळीं भुरगीं जल्माक आयल्यांत, अशी म्हायती तवडकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
