भांगरभूंय | प्रतिनिधी
जिल्लो रस्तो सुरक्षा समिती कडल्यान जंक्शनाची पळोवणी
पणजी: मेरशे जंक्शनाचेर जावपी येरादारीची आडखळ आनी कोफुसांव बंद करपा खातीर सरकारी खात्यां मदीं समन्वय आनी पारदर्शकताय दवरपा खातीर यंत्रणा स्थापन करतले. तशेंच येरादारीची आडखळ आनी रस्ते अपघातांचेर नियंत्रणां हाडपा खातीर आतां अत्याधुनिक एआय तंत्रगीन्यानाचो आदार घेतले, अशें गोवा कॅनचे समन्वय रोलन्ड मार्टीन्स हांणी सांगलें.
जिल्लो रस्तो सुरक्षा समितीन बुधवारा सकाळीं मेरशे जंक्शनाची पळोवणी केली. ह्या वेळार भौशिक बांदकाम खातें, राष्ट्रीय महामार्ग विभाग, येरादारी पुलीस हजर आशिल्ले. समितीची वांगडी एनजीओ गोवा कॅनचे समन्वयक रोलन्ड मार्टीन्स हांणी पळोवणे विशींची म्हायती दिली. पळोवणे वेळार रस्त्या लागसार गंभीर त्रुटी दिसून आयलो.
पळोवणे उपरांत मार्टिन्स हांणी सांगलें की विंगड-विंगड सरकारी खात्यां मदीं संवादाचो उणाव ही एक मुखेल अडचण जावन आसा. ही अडचण पयस करपा खातीर जंक्शनचें मॅपिंग जातलें आनी ह्या पुराय जाले उपरांत आमी संबंदीत नोडल अधिकार्यांचे ईमेल आनी मोबायल नंबर जाहीर करतले, जाका लागून जंक्शनाचेर सतत देखरेख दवरप शक्य जातलें.
जंक्शनार सिग्नल आनी कॅमेरे लावपाचें कंत्राट ‘बेलटेक’ (इशश्रींशलह) कंपनीक दिलां. हे कॅमेरे सिग्नल यंत्रणे कडेन जोडिल्ले आसतले. सरकार हे कॅमेरा पीपीपी मॉडेलार चलतले. हे एआय कॅमेर्यांचो प्रायोगीक प्रकल्प यशस्वी जाल्ल्यान आतां त्याच कंपनीक ताचें कंत्राट दिलां. फुडले बसकेंत जिल्लोधिकार्यां मुखार ही कंपनी तंत्रगीन्यानाचे सादरीकरण करतलें, अशीं म्हायती मार्टीन्स हांणी दिली.
जंक्शनार जाल्लीं अतिक्रमणां काडून उडोवपा खातीर समितीन सोमार मेरेनची मुजत दिल्या. रस्तो सुरक्षे खातीर थंय आशिल्ले पयलींचे बिनकामाचे बोर्ड काडून थंय नवे रस्तो सुरक्षा फलक लावपाची सुचोवणी केल्या. रस्ते येरादारी करप्यांक कसलोच त्रास जावंक फावना आनी तांकां अपुर्या सुचोवणें फलकांक लागून अडचण येवंक फावना, होच आमचो मुखेल उद्देश आसा, अशें मार्टीन्स हांणी म्हणलें.
हे गजालींक लागपी खर्च रस्तो सुरक्षा समितीच्या निधींतल्यान जातलो. सर्वोच्च न्यायालयाच्या आदेशा प्रमाण ही समिती तयार जाल्या आनी येरादारी उल्लंघनातल्यान जमा जाल्ल्या दंडांतली ५०% रक्कम रस्तो सुरक्षा निधींत वता. हो दुडू अशा कामां खातीर वापरप गरजेचें आसा, अशी सुचोवणी मार्टीन्स हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
