भांगरभूंय | प्रतिनिधी
म्हापशें: हडफडच्या ‘बर्च क्लब’ अग्नीतांडव प्रकरणांतले आरोपी गौरव लुथरा आनी सौरभ लुथरा हांची म्हापशें अतिरिक्त जिल्लो आनी सत्र न्यायालयान सशर्त जामिनाचेर सुटका केली. हो जामीन अर्ज मंजूर जरी जाला तरी बनावट भलायकी ना-हरकत दाखलो प्रकरणांत म्हापशें पुलिसांनी तांकां अटक केल्ल्यान प्रत्यक्षांत बंदखणींतल्यान भायर येवपा खातीर तांकां आजूनय कांय दीस वाट पळोवची पडटली.
बुधवारा जाल्ले सुनावणेंत न्यायाधीश द्विजपल पाटकार हांणी जामीन अर्जाचेर आपलो निवाडो दिला. न्यायालयान दरेकी ५० हजार रुपयांची वयक्तीक हमी रक्कम आनी तितलेच रकमेचो जामीनदार, हाचे वांगडा हेर गरजेच्यो अटी लागू केल्यात.
ह्यान पयलीं १२ फेब्रुवारीक म्हापशें अतिरिक्त जिल्लो आनी सत्र न्यायालयान लुथरा भावांचो जामीन अर्ज भायर मारिल्लो. उपरां दुबावितांनी परत नवो अर्ज सादर केलो. हाचेर ११ मार्चाक पयली सुनावणी जाल्ली. ६ डिसेंबर २०२५ दिसा साकवाडी- हणजुणच्या बर्च क्लबांत लागिल्ल्या भिरांकूळ उज्यांत ५ पर्यटकां सयत २० कर्मचार्यांचो, अशा वट्ट २५ जाणांक मरण आयिल्लें. जाल्यार ६ जाण गंभीर जखमी जाल्ले.
हणजूण पुलिसांनी ह्या प्रकरणांत वट्ट ११ जाणांक अटक केल्या. १४ दुबावितां आड भारतीय न्याय संहितेच्या विवीध कलमां खाला न्यायालयात आरोपपत्र सादर केलां.
आमच्या अशील लुथरा भावांचो जामीन अर्ज न्यायालयान मंजूर केला. सविस्तर निवाडोपत्र मेळ्ळे उपरांत अटी स्पश्ट जातल्यो. आतां आमी म्हापशें पुलिसांनी नोंद केल्ल्या बनावट ’एनओसी’ प्रकरणांत जामीन मेळोवपा खातीर न्यायालयांत अर्ज दाखल करतले. – अॅड. पराग राव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
