विस्वासाक वेर वता

भांगरभूंय | प्रतिनिधी

जें कितें घडलां ताका एकलो सोहम न्हय जाल्यार ताचे पालक तितलेच वा ताचे परस चड जापसालदार आसात अशें म्हजें तरी मत.

सद्याक सोहमाचें वासनाकांड प्रकरण गाजता. तशें पळोवंक गेल्यार वीस वर्सां हीं चड न्हय. आनी वीस वर्सांच्या भुरग्याक असलें दुश्कर्म सुचप म्हणल्यार अजाप कशें. कितल्याश्याच चलयांक आपणाल्या जाळांत ओडप, तांचो भोग घेवप आनी तांचे बुरशे व्हिडियो करून ते आपणाल्या इश्टां मदीं दाखोवप हाका विकृतीच म्हणची पडटली. एक भुरगो असलीं कर्मां करता आनी ताच्या घरच्यांक हांतलें कांयच खबर आसना हाचेर विस्वास दवरप कठीण जाता. खंयचोय बापूय आपलो भुरगो स्कुलांत वा कॉलेजींत कितें करता ताचेर नदर दवरून आसताच, आसुंकूच जाय. फक्त भुरग्याक एडमिशन घेवन दिलें, ताका बायक वा गाडी दिली, देसेंत कपडे दिले म्हणल्यार आपलें काम जालें अशें जर खंयचोय पालक समजता आसत जाल्यार तो पालक म्हणपाचे योग्यतायेचो न्हय अशेंच म्हणचें पडटलें. आपलो भुरगो वेवस्थीत स्कुलाक वता काय ना, ताका गाडयेक वा बायकाक दिसाक कितलें पेत्रोल लागता. घरा कडल्यान स्कुला कडेन वचपाचें अंतर कितलें. भुरगो वेळार घरा येता काय ना हें कोणे पळोवपाचें?
भुरग्याचीं पुस्तकां उगडून पळोवपाचें काम पालक करतात काय? ताचो फोन तपासून केन्ना पळेतात काय? ताचे कडेन केन्ना संभाशण करतात काय? काय ताका जाय तितले पयशे दिले म्हणजे पालकाचें कर्त्यव्य सोंपलें अशें दिसता हांकां? जें कितें घडलां ताका एकलो सोहम न्हय जाल्यार ताचे पालक तितलेच वा ताचे परस चड जापसालदार आसात अशें म्हजें तरी मत. आपल्या भुरगेपणांत गरिबीक लागून वा हेर कारणाक लागून आपणांक जायतें मेळ्ळें ना आनी आपूण तें सगलें आपल्या भुरग्याक दितलों अशें दर एका पालकाक दिसता. आनी अशें दिसपांत कांयच चूक ना. जें आपणाक मेळूंक ना तें भुरग्याक दिवचेंच पूण आपूण दितां तें योग्य मूं? हाचो भुरग्याचेर वायट परिणाम जावचो ना मूं? भुरगो हाता भायर वचचो ना मूं? हाचोय विचार जावप गरजेचें आसता. भुरग्याक जायतें न्हय जाल्यार योग्य तेंच दिवचें अशें सगले जाणकार सांगतात. पूण आमी खंय आयकतात? आमकां आमची गिरेस्तकाय जगा मुखार हाडची आसता आनी आमी तेंच करतात. तातूंत कश्ट करिनासतना आलायतो दुडू हातांत आयलो म्हणजे दुडवांची किंमत कळना आनी मागीर घडपाचें तेंच घडटा.
बरें सोहमान जांकां नादाक लायलीं तांचो तरी घरच्यांचेर विस्वास आसा? आशिल्लो जाल्यार अशें घडूंक पावचें नासलें. सद्याच्या संवसारांत घरच्यांचें एकमेकां कडलें संभाशण उणें जालां आसूंक जाय. आमचे वेळार अशें नासलें. भायर खंयूय एकादें फोण्ण जरी फुटलें तरी तें केन्ना भावंडांक वा आवयक वचून सांगता अशें जातालें. केन्ना केन्नाय ते गजाली खातीर तापोवणींय पडटालीं, शेर्मांवूय आयकुचे पडटाले पूण तातूंतल्यान बरें कितें आनी वायट कितें तें समजतालें. आतां हें संभाशणूच ना जालां. घडये एकमेकां कडेन उलोवंक कोणाकूच वेळ नासुये दर एकलो आपल्या कामांत दंग. मागीर अशें कितेंय घडलें म्हणजे कपलार हात मारपाचो. हांचो जर घरच्यांचेर विस्वास आशिल्लो आनी तांणी घरच्यांक कितें घडटा तें सांगिल्लें जाल्यार मुखा वयलें खूबशें घडचे पयलींच ना जावपाचें.
वाचूंक मेळटा ते प्रमाण, सोहमान एके चलयेक फोन करून तिचे बुरशे फोटू आपणांक धाडूंक सांगलें. आनी धाडले ना जाल्यार तिचे भयणीचे फोटू व्हायरल करपाची धमकी दिली. आतां कोणूय जाल्यार पयलीं भयणीक विस्वासांत घेवपाचो. खऱ्यांनीच तिचे सोहमा कडेन फोटू आसात काय ना तें पळोवपाचो. हांतल्यान भयणूय शिटकवपाची आनी एकतर सोहमाक जाप विचारपाची वा घरच्यां कडेन कागाळ करपाची. पूण हांगां तांचो घरच्यांचेरूय विस्वास नासलो अशेंच म्हणचें पडटलें. नासल्यार तीं घरच्यांक विस्वासांत घेवन आपणां कडल्यान घडिल्ली चूक सांगपाची आनी घरचीं ताचेर कितेंय तरी उपाय काडपाचीं. घरचीं जाणटीं घडये सोहमाच्या पालकांक हें कळोवंक शकतालीं वा पुलिशेंतूय कागाळ करूंक शकतालीं. पूण कोणेच कोणाकूच विस्वासांत घेवंक ना. जेन्ना पालकांचेरूच भुरगीं विस्वास दवरिनात तेन्ना हेरांचेर दवरपाचो प्रस्नूच येना. पुलिसांचेर तर सद्याक कोणाचोच विस्वास ना. म्हणूनच लोकांक मोर्चा घेवन वचचें पडटा आनी गरज थंय पुलिसांची बदली मागची पडटा. कारण आयज पुलीस हे राजकारण्यांच्या ताटा कडलीं माजरां जावन जियेतात.
हाकाच लागून लोकांक दर दिसा मोर्चे, उपास करून आपणाले प्रस्न लोकां मुखार हाडचे पडटात. राजकारण्यांनी जर पुलिसांक मेकळो हात दिल्लो तर लोकांचेर इल्लो धाक उरपाचो आनी असलीं नाका आशिल्लीं कांडां घडचीं नासलीं. एके वटेन पालक भुरग्यांचे अती लाड करतना दिसतात तर दुसरे वटेन बापुयूच आपल्या पुताचो जीव घेतना दिसता. कित्याक येवची ही परिस्थिती? भुरगो हाता भायर वता अशें जर बापायक दिसलें जाल्यार ताका समजावन उजू मार्गार हाडपाचे जायते उपाय आसात. ताका कावंसिलींग करून समजावंक येतालें. पूण कांय पालकांचो हट्ट आसता, हांव सांगतां तूं आयक. कांय पालकांक भुरग्यां कडेन उलोवंक वेळ आसना जाल्यार कांय पालकांक भुरग्यां कडेन कशें वागप तेंच कळना. ल्हानपणांनूच जर भुरग्याक बरें वळण मेळत जाल्यार मुखार भुरगो बरोच जाता. पूण योग्य वेळार वळण दिवंक कळूंक जाय. खंयचोय भुरगो बापाय आड पुलिशेंत कागाळ करता तेन्ना कितें समजुपाचें? बरें कोणूय अडाणी मनीस आसल्यार समजूं येतालें. पूण स्वताक सुशिक्षीत समजुपी, समाजसेवक म्हूण वावुरप्यांचे बाबतींत कितें म्हणप? सद्याक विस्वासाक वेर वता हें खरें. पालक आनी भुरग्यां मदीं विस्वास निर्माण जावप, तांचे मदीं सुसंवाद आसप भोव गरजेचें. अशें आसलें तरूच सोहम तयार जावचे नात. तुमकां कितें दिसता?

अभयकुमार वेलींगकार
9423884687