भांगरभूंय | प्रतिनिधी
हायड्रोलोजिस्टाचे अहवालांतल्यान शिटकावणी
पणजीः चिंबला ‘तोळ्यार’ तळ्याच्या पाणथळ वाठारांत, खास करून सर्व्हे क्र. ४०/१ आनी ४१/१ हातूंत प्रस्तावीत आशिल्ल्या उदरगतीच्या कामांक लागून तळ्याच्या अस्तित्वाक गंभीर धोको निर्माण जाला. हो वाठार तळ्याक उदका पुरवण करपी एक म्हत्वाचो स्रोत. तळ्याच्या ओलसाणीच्या वाठारांत मातयेचो भर घालून बांदकाम केल्यार तळ्याक उदकाची पुुरवण करपी सैमीक झरी पुराय बंद जावंक शकतात, अशी शिटकावणी तज्ञांनी दिल्या.
युनिटी मॉल प्रकल्प वादाचे फाटभूंयेर तोळ्यार तळ्याच्या पाणथळ वाठाराचे प्रभावीत वाठाराचे पर्यटन खातें, गोंय जैवविविधताय मंडळ, एनआयओ आनी थळावे हांणी सर्वेक्षण केल्ले. ह्या सर्वेक्षणाचो अहवाल थळाव्यांनी नेमिल्लो हायड्रोलोजीस्ट टेरा हायड्रोटॅक सोल्युशन्स हे एजन्सीच्या तज्ञानी तयार केला. ह्या अहवालांतल्यान ही म्हायती दिल्या. युनिटी मॉल प्रस्तावीत वाठारांत सर्वे क्र. ४०/१ आनी ४१/१ गंभीर त्रुटी अहवालांत दाखयल्यात. हे विशींचो पुराय अहवाल गोंय राज्य पाणथळ प्राधिकरणाक सादर केला.
तळ्याच्या पाणलोट क्षेत्रांत सर्व्हे क्रं. ४०/१, ४१/१, ४२/२ आनी १०६/१ हांचो आस्पाव आसा आनी हो वाठार तळ्याच्या उदकाची पातळी आनी पर्यावरणाचो समतोल सांबाळपा खातीर खुब गरजेचो आसा. सध्या सर्व्हे नंबर ४०/१ हातूंत व्हड प्रमाणांत बांदकाम आनी जमीन सपाटीकरण सुरू आसा. कॉंक्रीट आनी डांबरा सारकिल्ल्या घट्ट थरांक लागून पावसाचें उदक जमनीत जिरपाची संद उणी जाता, जाका लागून तळ्यांत येवपी उदकाचो प्रवाह उणो जावन गाळ साचपाचें प्रमाण वाडूं येता.
उदकाचो प्रवाह बदल्ल्यार आनी सिवेजीच्या उदकाचें योग्य नियोजन जावंक ना जाल्यार उथळ भुंयजल आनी सैमीक झरी प्रदुशीत जावपाची शक्यताय आसा. तशेंच, सेप्टिक टँक आनी सोक पिट हातुंतल्यान जावपी गळतीक लागून तळ्याचें भलायकी आनी थंयच्या पर्यावरणाचेर वायट परिणाम जावपाची शक्यता आसा.
सरकारी अधिसुचोवणेंत तोळ्यार तळ्याचो प्रभावीत वाठार चुकीचे पद्धतीन दाखयला. तळ्याचें रक्षण करपा खातीर सर्व्हे क्रं. ४०/१, ४१/१, ४२/२ आनी १०६/१चो कांय भाग तशेंच तळ्याच्या सकयल्या वाठारांतले सगळे व्हाळ आनी न्हंयो हांचो आसपाव प्रभावीत वाठारांत करप गरजेचें आसा. हाचेर बेगीनच उपाय येवजण करूंक ना जाल्यार ह्या वाठारांतल्या जैवविविधतेचेर गंभीर परिणाम जावंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
