भांगरभूंय | प्रतिनिधी
पणजीः कर्नाटक आनी महाराष्ट्र हांचे मदीं तयार जाल्ल्या टर्फाक लागून आनी हेर हवामानांतल्या बदलांक लागून हवामान खात्यान ३१ मार्च आनी १ आनी २ एप्रीलाक राज्यांत गडगडा सयत पावसाची शक्यताय उक्तायल्या. ते प्रमाण आयज आनी फाल्यां पावसाचो येलो अलर्ट जारी केला. जाल्यार २ एप्रीलाक कसलोच अलर्ट दिवंक ना. ३ ते ६ एप्रीलाक राज्यांतलें हवामान सुकें उरपाची शक्यताय आसा.
मंगळारा राज्यांतल्या कांय सुवातींनी दमट हवामान आशिल्लें. चडांत चड आनी उण्यांत उणें तापमान वाडत वचत उश्णताय चालूच आशिल्ली. पणजे चडांत चड ३४ अंश आनी उण्यांत उणें २५ अंश नोंद जाला. मुरगांवां चडांत चड तापमान ३३.६ अंश आनी उण्यांत उणें तापमान २५.२ अंश सेल्सियस उरलें. फुडले स दीस राज्यांतलें चडांत चड तापमान ३३ ते ३४ अंश आनी उण्यांत उणें तापमान २४ ते २५ अंश सेल्सियस उरपाची शक्यताय आसा असो अदमास हवामान खात्यान उक्तायला.
फाटल्या वर्साचे तुळेंत अंदूं मार्च म्हयन्यांत उश्णतायेचें प्रमाण उणें आशिल्लें. फाटल्या वर्सा मार्च म्हयन्यांत १० परस चड दीस उश्णतायेचो येलो अलर्ट दिल्लो. अंदूं सत्तरीच्या कांय सुवातींनी गडगडा सयत पावसाची नोंद जाल्या. एप्रिल आनी मे म्हयन्यांत गोंयांत चडांत चड आनी उण्यांत उणें तापमान सरासरी परस चड आसतलें असो अदमास खात्यान उक्तायला. ह्या काळांत राज्यांत सरासरी वा मात्सो उणो पावस पडपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
