भांगरभूंय | प्रतिनिधी
पणजी: राज्यांत सध्या गरमेचे दिस सुरू जाल्ल्यान लोकांनी, खास करून जाण्टे आनी भुरग्यांनी गरमेचे त्रास जावचे न्हय म्हुण काळजी घेवपाची गरज आसा. उश्णतायेच्या खरसाणेक लागून हिट स्ट्रोक येवप तशेंच हेर त्रास जावपाची शक्यता आसता.
गरमे पसून वाचपा खातीर हलक्या वजनाचे, हलक्या रंगाचे आनी सदळ कपडे घालचे. घरांत आनी खास करून रांदपाचे कुडींत हवा खेळटी उरपा खातीर दारां आनी जनेलां उक्तीं दवरचीं. दनपारां जनेलांक कर्टन, कपडो वा बॅडशीट लावचे. डिहायड्रेशन टाळपा खातीर भरपूर उदक, फळांचो ज्युस, ताक, लस्सी वा हेर पातळ द्रव्यां पिवचीं. वताक वा गरमेच्या वातावरणांत शारिरीक त्रासाचें चड काम करचें न्हय.
दनपारच्या वताच्या भारार शक्य जाता तितलें भायर वचपाचें टाळचें. भायर काम करतना वा शारिरीक व्यायाम करतना चड काळजी घेवपाची गरज आसा. तान लागूक ना तरी उदक/ज्युस पिवचो. पत्र्याचें पाखें आशिल्ल्या घरांनी चड गरमी जाल्ल्यान चड काळजी घेवपाची गरज आसा. गरमेच्या दिसांनी सोरो पिवपाचे टाळचें.
फकत आवयच्या दुदाचेर आशिल्ल्या भुरग्यांक गरमेच्या दिसांनी चड फावटीं दुदाक धरपाची गरज आसा. स म्हयन्यां वयल्या ज्या भुरग्यांक पुरक आहार दिवपाक सुरवात केल्या, तांका मदल्या वेळार थोड्या प्रमाणांत गरम केल्लें थंड उदक दिवपाक जाता. ल्हान भुरग्यांक न्हिदपाखातीर घरांतली थंड जागा निवडची. स म्हयन्यां वयल्या ल्हान भुरग्यांक दिसभर पातळ द्रव्यां दित रावचें. भुरग्यांक दनपारच्या वेळार वताक खेळपाक दिवचें न्हय.
गरमेक लागून तकली सणसणप, घुंवळ येवप, गरमी आसतना लेगीत घाम येवप ना, आंगाची कात तांबडी जावप, खरखरीत जावप, स्नायु कमजोर जावप, क्रॅम्प येवप, ओकारें येवप, उलटी जावप, सुस्ती मारप, काळीज धकधकप, स्वास घेवपाक त्रास जावप, मानसीक गोंधळ जावप, बेशुध्द जावप आनी हेर त्रास जावपी मनशाक वारो घोळपी उकत्या जाग्यार वा थंड, सावळी आशिल्ल्या जाग्यार व्हरचें. ताच्या आंगावयले नाका आशिल्ले कपडे काडचे. ताच्या कुडीचें तापमान देवोवपा खातीर फॅन चालू करून उदक वा झेलाच्या वोल्या कपड्यान आंग पुसून काडचें. स्वास घेवपाक चड त्रास जावप, बेशुध्द जावप अशा वेळार मनशाक लागींच्या भलायकी केंद्राचेर व्हरचें, अशें भलायकी खात्या वतीन कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
