भांगरभूंय | प्रतिनिधी
पणजीः फाटल्या सप्तकांत दृष्टी मरीनच्या जीवरक्षकांनी स जाणांचो जीव वाटयलो. जाल्यार दोन शेणिल्ल्या भुरग्यांचो सोद घेवन तांकां तांच्या पालकांकडेन दिले. मजगतीं गस्त घालतना जीवरक्षकांनी एक शेणिल्लो मोबायल फोन सोदून दिवपाकूय मजत केली.
बागा दर्यादेगेर उत्तर प्रदेशांतली एक १२ वर्सां पिरायेची चली दर्यादेगेर पेंवतना अचकीत तिचो तोल वचून खोल उदकांत गेली. जीवरक्षकांनी रोकडोच प्रतिसाद दिवन तिका सुरक्षितपणान देगेर हाडली. जाल्यार बागा दर्यादेगेर घडिल्ले दुसरे एके घडणुकेंत शेणिल्ल्या एका भुरग्याचो सोद घेवपाक येस आयलें आनी उपरांत ताका तांच्या फामिलीचे सुवादीन केलो. तशेंच, गस्त घालतना सांपडिल्लो एक मोबायल फोन पुलिसांचे हाजेरींत गरजेची पडताळणी करून धनयाक परत केलो.
कळंगुटे दर्यादेगेर बेंगळूर सावन आयिल्ले २१ आनी २८ वर्सां पिरायेचे दोग तरणाटे खोल उदकांत व्हांवत गेले आनी तांकां परत येवपाक अडचण जावपाक लागली. शिटूक जिवरक्षकांनी दोगांकय सुरक्षितपणान भायर काडले. हेच देगेर जयपूर राजस्थानाचो ७ वर्सां पिरायेचो चलो शेणिल्लो. सोद मोहीम राबोवन ताका सोदून काडलो आनी वळख पटोवन ताच्या बापायच्या ताब्यांत दिलो.
कांदोळी दर्यादेगेर लुधियाना पंजाबचे १६ वर्सां पिरायेचे एके चलयेक वॉटर स्पोर्ट्स केले उपरांत तिका फिट आयली. लायफसेव्हर्सनी रोखडीच मदत करून तिका मुळावो उपचार दिवन तिका लागींच्या भलायकी केंद्रांत व्हेली.
जाल्यार बाणावले दर्यादेगेर धांवतान एका ७१ वर्सा पिरायेच्या मनशाक रस्ताद सुण्यान घांस मारलो. जीवरक्षकांनी घडणुक थळार वचून ताका मुळवो उपचार दिलो.
आगोंद दर्यादेगेर पुण्याचो एक ४७ वर्सां पिरायेचो मनीस कायकिंग करतना दर्यादेगे सावन सुमार १०० मीटर अंतराचेर दर्यांत पडलो आनी ताका परत येवपाक कठीण जालें. जीवरक्षकांनी रोखडेंच ’जेट-स्की’चे मजतीन ताका वाटावन दर्यादेगेर हाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
